काठमाडौं । सरकारले काठमाडौं उपत्यकाका नदी किनार तथा जोखिमपूर्ण सार्वजनिक र सरकारी जग्गामा निर्माण गरिएका अव्यवस्थित बस्ती हटाउने अभियानलाई तीव्रता दिएको छ ।
यसअन्तर्गत काठमाडौं महानगरपालिका वडा नं. ११ स्थित थापाथली क्षेत्रको बस्ती खाली गराइएको छ भने वडा नं. ९ को गैरीगाउँ र वडा नं. ३१ को शान्तिनगरमा बस्ती हटाउने कार्य जारी रहेको छ ।
यस्तै कागेश्वरी मनोहरा नगरपालिका वडा नं. ८ को गोठाटार बुद्धचोक र वडा नं. ९ को मनोहरा टोलमा रहेका अनधिकृत बस्तीहरू पनि खाली गराउने तयारी गरिएको छ ।
अधिकारसम्पन्न बागमती सभ्यता एकीकृत विकास समिति ले २०७९ सालमा सार्वजनिक गरेको प्रतिवेदनअनुसार उपत्यकाका नदी किनार क्षेत्रमा ३ हजार ४९६ घरधुरी अव्यवस्थित रूपमा बसोबास गर्दै आएका छन् । तीमध्ये काठमाडौं महानगरभित्र २ हजार २४५, कागेश्वरी मनोहरामा ९०, बुढानीलकण्ठमा १५६, ललितपुर महानगरमा १७ तथा भक्तपुर नगरपालिकामा ७७३ घरधुरी रहेका छन् । पछिल्ला तीन वर्षमा संख्या बढेको हुन सक्ने अनुमानसहित उपत्यकामा करिब चार हजार अव्यवस्थित बसोबासी रहेको आँकलन गरिएको छ ।
बस्ती हटाउने क्रममा नेपाल प्रहरी तथा महानगरका सुरक्षाकर्मीहरूले स्थानीयलाई सामान संकलन र ढुवानीमा सहयोग गरेका छन् । स्थानीय बासिन्दाले समेत सहयोग गरेपछि थापाथलीमा बस्ती शान्तिपूर्ण रूपमा खाली गरिएको जनाइएको छ ।
हालसम्म थापाथली क्षेत्रका ६८ परिवार सरकारको सम्पर्कमा आएका छन् भने अन्य प्रभावित क्षेत्रबाट पनि सम्पर्कमा आउने क्रम जारी छ । सम्पर्कमा आएका परिवारलाई दशरथ रंगशाला मा राखेर विवरण संकलन गरिँदैछ र त्यसपछि काठमाडौंका विभिन्न होटलहरूमा अस्थायी बसोबासको व्यवस्था गर्ने तयारी गरिएको छ ।
यसैबीच घरायसी सामानहरू राधास्वामी सत्संग ब्यास नेपाल मा सुरक्षित रूपमा भण्डारण गरिएको छ । होटलमा राखिएका परिवारहरूको पहिचान गरी वास्तविक सुकुम्बासी हुन् वा होइनन् भन्ने प्रक्रिया भोलिबाट सुरु गरिनेछ । वास्तविक सुकुम्बासी ठहरिएका परिवारलाई दुई साताभित्र नागार्जुन नगरपालिका वडा नं. १ स्थित सरकारी अपार्टमेन्टमा स्थानान्तरण गर्ने योजना रहेको छ ।
सरकारले यस अभियानसँगै दीर्घकालीन पुनःस्थापना तथा व्यवस्थापनको काम पनि अगाडि बढाउने जनाएको छ ।
प्रतिक्रिया