धोबीखोलाको साततले घर डोजरले कोपरेर मात्र छोडियो

काठमाडौं । सरकारले सुकुम्बासी तथा अव्यवस्थित बसोबासी बस्तीमाथि डोजर चलाइरहेका बेला धोबीखोलास्थित एक साततले घरमा गरिएको आंशिक भत्काइ कारबाहीले नयाँ विवाद सिर्जना गरेको छ।

धोबीखोलामा इन्द्र चाम्लिङको स्वामित्वमा रहेको चर्चित साततले घरको अगाडिको भागमा डोजर चलाइएको छ। सरकारी जग्गा मिचिएको तथा मापदण्ड उल्लंघन भएको भन्दै घरको अगाडिको संरचनामा क्षति पुर्‍याएको हो। दुईवटा डोजर प्रयोग गरेर पाँच तल्लासम्म सिसा फुटाउने र गाह्रो कोतर्ने काम गरिएको थियो।

तर, पूर्ण रूपमा घर नभत्काई अगाडिको भागमा मात्रै क्षति पुर्‍याएर डोजर फर्काइएपछि अन्योल बढेको छ। अब बाँकी संरचना घरधनी आफैंले भत्काउनुपर्ने वा नपर्ने भन्नेबारे सरकारी पक्षले कुनै स्पष्ट जानकारी दिएको छैन।

घरधनी इन्द्र चाम्लिङले भने आफूसँग कुनै समन्वय नगरी एकाएक डोजर चलाइएको भन्दै असन्तुष्टि व्यक्त गरेका छन्। उनले आफ्नो जग्गाको लालपुर्जा, घरको नक्सापास तथा अदालतले यसअघि दिएको आदेश घरको भित्तामै टाँसेर वैधानिकताको दाबी गरेका थिए।
यस घटनाले सरकारको पछिल्लो डोजर अभियानमाथि थप प्रश्न उठाएको छ।