काठमाडौं । नेपाल बार एसोसिएसनले सर्वोच्च अदालत प्रशासनले न्यायिक प्रक्रियामा अवरोध सिर्जना गरेको आरोप लगाउँदै दिउँसै लालटिन बालेर विरोध प्रदर्शन गरेको छ ।
संवैधानिक महत्वका रिट निवेदन दर्ता नगरी न्यायिक प्रक्रियामै अवरोध गरिएको भन्दै बारले विरोध प्रदर्शन आयोजना गरेको हो । प्रदर्शनका क्रममा कानून व्यवसायीहरूले “न्यायको खोजी” र “स्वच्छ प्रक्रियाको खोजी” लेखिएका प्लेकार्ड प्रदर्शन गरेका थिए ।
बारका अध्यक्ष विजय प्रसाद मिश्रले अदालत सबैका लागि खुला हुनुपर्ने बताउँदै मुद्दा दर्ता नगर्ने वा अनावश्यक रूपमा अल्झाएर राख्ने प्रवृत्तिको बारले सधैं विरोध गर्ने बताए ।
बारका अनुसार पछिल्लो समय संवैधानिक महत्वका विभिन्न रिट निवेदन सर्वोच्च अदालत प्रशासनले दर्ता नगरी फर्काउने गरेको छ । साथै, त्यस्ता निर्णयविरुद्ध परेका निवेदनसमेत लामो समयसम्म दर्ता नगर्दा न्यायिक प्रक्रियामा अवरोध उत्पन्न भएको आरोप लगाइएको छ ।
यसैबीच, अदालतमा विचाराधीन विषयमा संसद्मा छलफल भएको विषयप्रति पनि बारले कडा आपत्ति जनाएको छ ।
प्रतिक्रिया