बुटवल । मदन भण्डारी स्पोर्टस् एकेडेमीले मदन भण्डारीको ७५ औँ जन्मजयन्तीको अवसर पारेर विद्यालयस्तरीय राष्ट्रिय छात्र भलिबल प्रतियोगिता आयोजना गर्ने भएको छ । १९ वर्षमुनिका छात्र खेलाडीलाई लक्षित गर्दै आयोजना गरिएको प्रतियोगिता बिहीबारदेखि बुटवलमा सुरु हुने भएको हो ।
बुधबार बुटवलमा आयोजित पत्रकार सम्मेलनमा एकेडेमीका केन्द्रीय अध्यक्ष ध्रुव आचार्यले विद्यालय तहबाटै भलिबल खेलको विकास र प्रतिभा पहिचान गर्ने उद्देश्यसहित प्रतियोगिता सञ्चालन गर्न लागिएको जानकारी दिए ।
प्रतियोगितामा देशभरका आठ टोलीको सहभागिता रहनेछ । सहभागी टोलीमा न्युटन हाई स्कूल (बागमती), पोखरा युनाइटेड क्लब (कास्की), इन्सपिरेसन इङ्लिस स्कूल (झापा), न्यू होराइजन स्कूल (बुटवल), दीप बोर्डिङ हाई स्कूल (बुटवल), मणिमुकुन्द कलेज (बुटवल), मण्डला स्पोर्टस् एकेडेमी (पाल्पा) र नवलपुर एकेडेमी रहेका छन् ।
कार्यक्रम संयोजक राम केसीका अनुसार प्रतियोगिताको विजेता टोलीले एक लाख रुपैयाँ नगद पुरस्कार प्राप्त गर्नेछ । यस्तै उपविजेताले ५० हजार, तृतीय स्थान हासिल गर्ने टोलीले ३० हजार तथा सान्त्वना हुने टोलीले १५ हजार रुपैयाँ पुरस्कार पाउनेछ ।
प्रतियोगितामा उत्कृष्ट खेल प्रदर्शन गर्ने खेलाडीहरूलाई पनि विशेष पुरस्कारको व्यवस्था गरिएको छ । उत्कृष्ट खेलाडीले १० हजार रुपैयाँ प्राप्त गर्नेछन् भने बेस्ट प्लेयर, बेस्ट स्पाइकर, बेस्ट सेटर, बेस्ट ब्लकर र बेस्ट डिफेन्डरलाई जनही पाँच हजार रुपैयाँसहित शिल्ड, मेडल र प्रमाणपत्र प्रदान गरिने एकेडेमीका केन्द्रीय सचिवालय सदस्य विनोद आचार्यले जानकारी दिए ।
पाँच दिनसम्म सञ्चालन हुने प्रतियोगिताका खेलहरू बुटवलस्थित न्यू होराइजन विद्यालयको खेल मैदानमा हुनेछन् । मदन भण्डारी स्पोर्टस् एकेडेमीले खेलकुद क्षेत्रको विकास र युवा प्रतिभाको प्रोत्साहनका लागि हरेक वर्ष विभिन्न प्रतियोगिताहरू आयोजना गर्दै आएको छ ।
प्रतिक्रिया