काठमाडौं । कतारको रस लाफान औद्योगिक क्षेत्रस्थित ग्यास उत्पादन केन्द्रमा आइतबार भएको विस्फोटमा नेपालीसहित विभिन्न देशका नागरिक घाइते भएका छन् । घटनामा १२ भारतीय र एक पाकिस्तानी नागरिक गरी १३ जनाको मृत्यु भएको छ भने ६६ जनाभन्दा बढी घाइते भएका छन् ।
घाइते हुनेहरूमा नेपाल, कतार, भारत, पाकिस्तान, बंगलादेश, केन्या, घाना, तान्जानिया र नाइजेरियाका नागरिक रहेका छन् । उनीहरूको उपचार जारी रहेको भए पनि घाइतेहरूको नामावली सार्वजनिक गरिएको छैन ।
कतारका ऊर्जा मन्त्री साद अल-काबीले सोमबार मृत्यु र घाइतेहरूको विवरण सार्वजनिक गर्दै घटनालाई आक्रमण नभई दुर्घटना भएको बताएका छन् । उनले तोडफोड वा शत्रुतापूर्ण गतिविधिको कुनै संकेत नभएको स्पष्ट पारे ।
दोहास्थित भारतीय दूतावासले पनि रस लाफान घटनामा १२ भारतीय नागरिकको मृत्यु भएको पुष्टि गरेको छ । दूतावासका अनुसार घाइते सबैको अवस्था स्थिर रहेको र उनीहरूले आवश्यक उपचार पाइरहेका छन् ।
विस्फोटको आवाज राजधानी दोहासम्म महसुस भएको थियो । प्रत्यक्षदर्शीहरूले घटनापछि ठूलो आगोको ज्वाला र बाक्लो धुवाँ देखिएको बताएका छन् । आगलागी भने आइतबार राति नै नियन्त्रणमा लिइएको थियो ।
ऊर्जा मन्त्री अल-काबीका अनुसार घटनाले कतारको ग्यास निर्यात तथा स्थानीय आपूर्तिमा कुनै असर पारेको छैन । साथै, वातावरणमा पनि कुनै नकारात्मक प्रभाव नपरेको उनले बताएका छन् ।
प्रतिक्रिया