काठमाडौं । नेपाल बडीबिल्डिङ तथा फिटनेस महासंघको समन्वय तथा राष्ट्रिय खेलकुद परिषद् (राखेप) को स्वीकृतिमा नेपालका सात खेलाडी १६ औँ दक्षिण एसियाली शारीरिक सुगठन तथा फिजिक स्पोर्ट्स च्याम्पियनसिप-२०२६ मा सहभागी हुने भएका छन् । प्रतियोगिता असार १६ देखि २० गतेसम्म भुटानमा आयोजना हुँदैछ ।
राखेपको आधिकारिक स्वीकृतिअनुसार नेपालबाट विभिन्न तौल समूह तथा फिजिक विधामा सात खेलाडीले प्रतिस्पर्धा गर्नेछन् । टोलीमा बिनु जीटी (महिला मोडल फिजिक-१५५ से.मि. माथि), सीता खत्री (महिला एथलेटिक फिजिक), सगेन्द्र सिंह (पुरुष बडीबिल्डिङ-७५ केजी), दीपजंग रोका मगर (पुरुष बडीबिल्डिङ-८० केजी), सागर श्रेष्ठ (पुरुष बडीबिल्डिङ-८५ केजी), आकाश श्रेष्ठ (मेन्स स्पोर्ट्स फिजिक-१७० से.मि.भन्दा कम) र पुकार श्रेष्ठ (मेन्स स्पोर्ट्स फिजिक-१७५ से.मि.भन्दा माथि) रहेका छन् ।
टोलीको नेतृत्व नेपाल बडीबिल्डिङ तथा फिटनेस महासंघका सचिव तथा प्राविधिक निर्देशक दिनेश कुमार राजभण्डारीले गर्नेछन् भने अन्तर्राष्ट्रिय निर्णायकका रूपमा जोन्सन जोन्छेन सहभागी हुनेछन् ।
प्रतियोगितामा सहभागी हुने नेपाली टोलीलाई विशेष कार्यक्रमबीच ट्र्याकसुट वितरण गर्दै औपचारिक बिदाइ गरिएको छ । कार्यक्रममा महासंघका अध्यक्ष राजेशबाबु श्रेष्ठले खेलाडीहरूलाई सफलताको शुभकामना दिँदै अन्तर्राष्ट्रिय मञ्चमा उत्कृष्ट प्रदर्शनमार्फत नेपालको प्रतिष्ठा उँचो बनाउने विश्वास व्यक्त गरे ।
त्यस अवसरमा नयाँबजार डिभाइन फिजिकल फिटनेसका तर्फबाट दिनेश कुमार राजभण्डारीले सम्पूर्ण खेलाडीलाई प्रतियोगिताका लागि टी-शर्ट वितरण गरेका थिए ।
दक्षिण एसियाली स्तरको प्रतिष्ठित प्रतियोगितामा सहभागी नेपाली टोलीबाट यसपटक पदकसहित उत्कृष्ट नतिजाको अपेक्षा गरिएको छ । महासंघले खेलाडीहरूले उच्च मनोबलका साथ प्रतिस्पर्धा गर्दै नेपालको झण्डा अन्तर्राष्ट्रिय मञ्चमा गौरवान्वित बनाउने विश्वास व्यक्त गरेको छ ।
प्रतिक्रिया