वामपन्थी एकताको समय आएको छ : झलनाथ खनाल

काठमाडौं । पूर्वप्रधानमन्त्री एवं नेपाली कम्युनिस्ट पार्टी (नेकपा)का वरिष्ठ नेता झलनाथ खनालले वामपन्थी शक्तिहरूबीचको एकता समयको आवश्यकता भएको बताएका छन् ।

आइतबार काठमाडौंको राष्ट्रिय सभागृहमा जननेता मदन भण्डारीको ७५ औँ जन्मजयन्तीका अवसरमा आयोजित कार्यक्रममा बोल्दै उनले विगतदेखि नै वामपन्थी एकताको आवश्यकता रहे पनि विभिन्न कारणले त्यो सम्भव हुन नसकेको बताए ।

“वामपन्थी एकता आज मात्रै होइन, धेरै अघिदेखिको आवश्यकता हो । तर बीचमा कहिले ‘सिङ’ पलायो, कहिले ‘जुरो’ पलायो, कहिले अन्य कारणले हामी एकताबद्ध हुन सकेनौँ,” उनले भने ।

खनालले अहिले फेरि वामपन्थी शक्तिहरू एकताबद्ध हुने अनुकूल वातावरण बनेको उल्लेख गर्दै विचारको स्तरबाट सुरु भएको सहकार्यलाई दीर्घकालीन राजनीतिक एकतामा रूपान्तरण गर्नुपर्ने धारणा राखे ।

उनले कार्यक्रममा उपस्थित नेताहरूलाई ‘वामपन्थी एकता जिन्दाबाद’को नारा लगाउन समेत आग्रह गर्दै अब एकताको अभियानलाई व्यवहारमा उतार्नुपर्नेमा जोड दिए ।