रास्वपाको अनुशासन आयोग प्रमुखमा लेखनाथ पौडेल

काठमाडौं । राष्ट्रिय स्वतन्त्र पार्टी (रास्वपा)को प्रथम महाधिवेशनपछि बसेको पहिलो केन्द्रीय समिति बैठकले अनुशासन आयोगको प्रमुखमा उच्च अदालतका पूर्वन्यायाधीश लेखनाथ पौडेललाई मनोनित गरेको छ ।

पार्टीका केन्द्रीय सहमहामन्त्री हरि ढकालका अनुसार कास्की निवासी पौडेललाई अनुशासन आयोगको नेतृत्व दिने प्रस्ताव सभापति रवि लामिछानेले बैठकमा प्रस्तुत गरेका थिए, जसलाई बैठकले सर्वसम्मत रूपमा अनुमोदन गरेको हो ।

बैठकले निर्वाचन आयोग र लेखा आयोगमा भने साविककै पदाधिकारीलाई निरन्तरता दिने निर्णय गरेको छ । यससँगै पार्टीका आन्तरिक संरचनाहरूलाई निरन्तरता दिँदै संगठनलाई थप व्यवस्थित बनाउने प्रक्रिया अघि बढाइएको छ ।

प्रथम महाधिवेशनबाट निर्वाचित नयाँ केन्द्रीय समितिको पहिलो बैठकले विभिन्न संगठनात्मक संरचनालाई पूर्णता दिने क्रममा उक्त निर्णय गरेको र आगामी दिनमा पार्टीलाई संस्थागत रूपमा अझ सुदृढ बनाउने दिशामा काम गर्ने जनाएको छ ।