काठमाडौं । राष्ट्रिय मानवअधिकार आयोगले १८ वर्षमुनिका बालबालिकालाई पार्टी सदस्यता वितरण गरिएको विषयमा राष्ट्रिय स्वतन्त्र पार्टी (रास्वपा)सँग स्पष्टीकरण मागेको छ।
आयोगले बुधबार रास्वपालाई पत्राचार गर्दै सञ्चारमाध्यममा प्रकाशित समाचारका आधारमा बालबालिकालाई पार्टी सदस्यता वितरण गरिएको भन्ने विषयमा यथाशीघ्र जवाफ उपलब्ध गराउन आग्रह गरेको हो।
हालै १८ वर्षभन्दा कम उमेरका बालबालिकालाई पार्टी सदस्यता दिएको विवरण सार्वजनिक भएपछि रास्वपा आलोचनामा परेको छ। त्यसै विषयलाई लिएर राष्ट्रिय मानवअधिकार आयोग ले पनि औपचारिक रूपमा दलसँग जवाफ मागेको हो।
आयोगले पत्रमार्फत १८ वर्षमुनिका बालबालिकालाई पार्टी सदस्यता वितरण गरिएको पुष्टि भएमा त्यस्तो कार्य प्रचलित नेपाली कानुन तथा नेपालले गरेका अन्तर्राष्ट्रिय प्रतिबद्धताविपरीत हुने उल्लेख गर्दै सम्बन्धित पक्षलाई सचेतसमेत गराएको छ।
आयोगले यस विषयमा प्राप्त हुने जवाफ र तथ्यका आधारमा आवश्यक थप प्रक्रिया अघि बढाउने संकेत गरेको छ।
प्रतिक्रिया