काठमाडौं । पत्रकार खेम भण्डारी पक्राउ परेका छन् । कञ्चनपुरको भीमदत्त नगरपालिका-१८ कटान क्षेत्रबाट बिहीबार बिहान उनलाई प्रहरीले पक्राउ गरेको हो ।
कञ्चनपुर प्रहरीले अदालतको फैसला कार्यान्वयन गर्ने क्रममा भण्डारीलाई पक्राउ गरिएको जनाएको छ । निर्मला पन्त बलात्कारपछि हत्या प्रकरणसँग सम्बन्धित गाली बेइज्जती मुद्दामा कञ्चनपुर जिल्ला अदालतले उनलाई दोषी ठहर गरेको थियो ।
जिल्ला अदालत कञ्चनपुरका न्यायाधीश राजेन्द्रसिंह भण्डारीको इजलासले २०८२ जेठ १ गते भण्डारीलाई गाली बेइज्जतीको कसुरमा एक महिनाको कैद सजाय सुनाएको थियो । अदालतले उनलाई १० हजार रुपैयाँ जरिबाना र एक लाख रुपैयाँ क्षतिपूर्ति तिर्नसमेत आदेश दिएको थियो ।
निर्मला पन्त हत्या प्रकरणमा आफूलाई तथ्यहीन रूपमा जोडेर समाचार प्रकाशन गरेको आरोप लगाउँदै कञ्चनपुरका तत्कालीन प्रहरी उपरीक्षक (एसपी) दिल्लीराज विष्टका छोरा किरण विष्टले भण्डारीविरुद्ध मुद्दा दायर गरेका थिए । दिल्लीराज विष्ट हाल प्रहरी सेवाबाट अवकाश प्राप्त गरिसकेका छन् ।
२०७५ साउन १० गते साथीको घर गएकी किशोरी निर्मला पन्तको शव भोलिपल्ट बलात्कारपछि हत्या गरिएको अवस्थामा फेला परेको थियो । बहुचर्चित उक्त घटनाको वास्तविक दोषी अझै पहिचान हुन नसकेको र प्रकरण हालसम्म टुङ्गोमा पुग्न सकेको छैन ।
पक्राउ परेका पत्रकार भण्डारीलाई थप कानुनी प्रक्रियाका लागि बिहीबार नै जिल्ला अदालतमा उपस्थित गराइएको प्रहरीले जनाएको छ ।
प्रतिक्रिया