डडेल्धुरामा जिप दुर्घटना, दुई जनाको मृत्यु

धनगढी । डडेलधुरामा बोलेरो जिप दुर्घटना हुँदा दुई जनाको मृत्यु भएको छ । धनगढीदेखि दार्चुला जाँदै गरेको सु प प्र ०१००१ ज १८५० नम्बरको बोलेरो जिप आज बिहान दुर्घटना भएको हो ।

जिल्लाका अमरगढी नगरपालिका–७ खसरेखानमा शनिबार बिहान भएको बोलेरो दुर्घटनामा पर्दा तीन जना घाइते भएका छन्।  मृत्यु हुनेमा दार्चुलाको अपिहिमाल गाँउपालिका–१ का २५ वर्षीय शुभम लोथ्याल र सोही ठाउँका २० वर्षीय हुम लोथ्याल रहेका छन् ।

धनगढीबाट दार्चुलातर्फ जाँदै गरेको जिप बिहान करिब ३ः०० बजे सडकबाट करिब ५०० मिटर तल भिरमा खसेको थियो । स्थानीयले सो बारेमा जानकारी दिए लगत्तै नेपाल प्रहरी, ट्राफिक प्रहरी र सशस्त्र प्रहरीको संयुक्त टोली घटनास्थल पुगेर उद्धार कार्य सञ्चालन गरेको थियो।

घाइते पाँचै जनालाई तत्काल उपचारका लागि डडेलधुरा अस्पताल पुर्‍याइएको थियो भने उपचारकै क्रममा दुई जनाको मृत्यु भएको प्रहरीले जनाएको छ । बाँकी तीन जनाको अस्पतालमा उपचार भइरहेको छ।

दुर्घटनाको कारण खुल्न बाँकी रहेको प्रहरीले जनाएको छ।