नेपालगन्ज । नेपालगन्जबाट बर्दिया हुँदै सुदूरपश्चिम प्रदेश जाने सवारी साधनहरुले हुलाकी राजमार्गलाई नै बसपार्क बनाएका छन् । नेपालगन्ज गुलरिया सडक अन्तर्गत हुलाकी राजमार्गको खजुरारोडमा मुख्य राजमार्गमा नै बसपार्क बनाइएको हो ।
नेपालगन्जमा सुबिधासम्पन्न बसपार्क संचालनमा रहेपनि त्यहाँबाट निकै कम संख्यामा यातायात संचालन हुने गरेका छन् । मुख्य राजमार्गलाई नै बसपार्क बनाइएपछि खजुरारोड भएर यात्रा गर्ने यात्रुहरुले दिनदिनै हैरानी ब्यहोर्न बाध्य बनेका छन् । पश्चिम रुटका साना र मझौला सवारी साधनहरुले बनाएको बसपार्क जिल्ला प्रहरी कार्यालय बाँकेको प्रवेशद्वारसँगै जोडिएको छ ।
हरेकदिन जिल्ला प्रहरी कार्यालयको प्रवेशद्वारमा नै ट्राफिक अस्तब्यस्तहुने गरि सडकमा सवारी साधन पार्किङ गर्दापनि त्यस स्थानमा प्रहरी उपस्थिती नदेखिएको स्थानीयले बताएका छन् । समान्यतया स्थानीयतहको कार्यक्षेत्रमा बसपार्क बनाउन स्थानीय पालिकाको स्वीकृती लिन अनिवार्य भएपनि खजुरारोडमा बनाइएको बसपार्कको सम्बन्धमा नेपालगन्ज उपमहानगरपालिका बेखबर रहेको छ ।
नेपालगन्ज उपमहानगर प्रमुख प्रशान्त विष्टले नेपालगन्ज बसपार्क बाहेक अन्यत्र कहिँकतै बसपार्क संचालनको स्वीकृती नदिएको बताए । यात्रु चढाउन र झार्नका लागि ५ मिनेट सवारी रोक्नदिने गरि सहमति दिएपनि बसपार्ककै रुपमा संचालन गर्न बसपार्क बाहेक अन्यत्र स्वीकृती नदिएको उनले बताए ।
सवारी पार्किङको स्वीकृति दिने क्षेत्राधिकार स्थानीय तहको भएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले बताए । उनले सडकमा अनाधिकृत पार्किङ गरिए ट्राफिक प्रहरीले कारवाही गर्ने गरेपनि निजि कम्पनीहरुले निजी जग्गामा पार्किङ गरिएको सम्बन्धमा केही गर्न नसकिने बताए । अनाधिकृत बसपार्कको स्थानीयतहबाटै अनुगमन हुनुपर्ने उनको भनाई छ ।
अनाधिकृत राजमार्गमा नै बसपार्क बनाइएकै क्षेत्रबाट जिल्ला प्रहरी कार्यालयको सवारी साधन दर्जनौ पटक ओहरदोहर गरेपनि राजमार्गमा छरप्रस्ट अनाधिकृत सवारी उठाउने नाममा पार्किङ गरिएको यातायातको साधन व्यवस्थापनमा भने प्रहरीले चासो देखाएको छैन ।
फोटो : श्रीराम सिग्देल
प्रतिक्रिया