काठमाडौं । नेपाल कम्युनिस्ट पार्टी (नेकपा)का संस्थापक महासचिव पुष्पलाल श्रेष्ठको ४८ औँ स्मृति दिवस आज देशभर विभिन्न कार्यक्रम आयोजना गरी मनाइँदैछ ।
स्मृति दिवसका अवसरमा नेकपा (एमाले) राजधानी प्रदेश कमिटीले विशेष कार्यक्रम आयोजना गरेको छ । यसैगरी नेपाल कम्युनिस्ट पार्टीसहित विभिन्न वामपन्थी दल तथा संगठनहरूले पनि पुष्पलालको योगदानको स्मरण गर्दै विविध कार्यक्रम गर्ने भएका छन् ।
विसं १९८१ साल असार १५ गते रामेछापमा पिता भक्तलाल श्रेष्ठ र आमा तुलसीकुमारी श्रेष्ठका माहिला छोराका रूपमा जन्मिएका पुष्पलाल नेपाली कम्युनिस्ट आन्दोलनका प्रमुख संस्थापक तथा वैचारिक नेताका रूपमा परिचित छन् । उनी प्रजातान्त्रिक योद्धा शहीद गङ्गालाल श्रेष्ठका भाइ पनि हुन् ।
पुष्पलालले कार्ल मार्क्स र फ्रेडरिक एङ्गेल्सद्वारा लिखित ‘कम्युनिस्ट मेनिफेस्टो’ पहिलो पटक नेपाली भाषामा अनुवाद गरेका थिए । साथै, विभिन्न पुस्तक र लेखमार्फत नेपाली समाजको वर्गीय विश्लेषण गर्दै कम्युनिस्ट आन्दोलनलाई वैचारिक आधार प्रदान गरेका थिए ।
विसं २००६ साल वैशाखमा निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर भारतको कोलकातामा नेपाल कम्युनिस्ट पार्टी (नेकपा) स्थापना गरेका पुष्पलालले त्यसअघि विसं १९९८ सालमा नेपाली प्रजातान्त्रिक सङ्घ गठनमा पनि महत्वपूर्ण भूमिका खेलेका थिए ।
पञ्चायती व्यवस्थाविरुद्ध नेपाली कांग्रेसलगायत लोकतान्त्रिक शक्तिसँग सहकार्य गर्दै संयुक्त जनआन्दोलन सञ्चालन गर्नुपर्ने धारणा राख्ने पुष्पलालको उपचारका क्रममा विसं २०३५ साल साउन ७ गते भारतको नयाँदिल्लीमा निधन भएको थियो । नेपालको कम्युनिस्ट आन्दोलनका अग्रणी नेताका रूपमा उनको योगदान आज पनि स्मरण गरिन्छ ।
प्रतिक्रिया