काठमाडौं । आईसीसी क्रिकेट विश्वकप लिग-२ अन्तर्गतको त्रिकोणात्मक एकदिवसीय शृङ्खलामा नेपालले आज आयोजक नेदरल्यान्ड्ससँग प्रतिस्पर्धा गर्दैछ । पहिलो खेलमा नामिबियासँग आठ विकेटले पराजित भएको नेपाल दोस्रो खेलमा जित निकाल्दै प्रतियोगितामा पुनरागमन गर्ने लक्ष्यमा रहेको छ ।
नेपाली समयअनुसार दिउँसो २ः४५ बजे नेदरल्यान्ड्सको उट्रेख्तस्थित मैदानमा सुरु हुने खेल नेपालका लागि निकै महत्त्वपूर्ण मानिएको छ । शीर्ष चारभित्र रहेर विश्वकप छनोटको सम्भावना कायम राख्न नेपाललाई बाँकी खेलमा उत्कृष्ट प्रदर्शन आवश्यक छ ।
नेपालले यसअघि नामिबियासँग पराजय बेहोरेपछि चार अंक गुमाएको थियो । त्यसैले आजको खेलमा जित निकाल्दै अंक तालिकामा आफ्नो स्थिति बलियो बनाउने लक्ष्य टोलीको रहेको छ ।
यस शृङ्खलामा नेपालले जुलाई २७ मा पुनः नामिबियासँग तथा जुलाई २९ मा फेरि नेदरल्यान्ड्ससँग खेल्ने तालिका छ ।
हालसम्म २९ खेलबाट २४ अंक जोडेको नेपाल अंक तालिकाको पाँचौँ स्थानमा छ । समान खेल खेलेको नामिबियासँग पनि २४ अंक रहे पनि राम्रो रनरेटका आधारमा नामिबिया छैटौँ स्थानमा छ । आयोजक नेदरल्यान्ड्स २८ खेलबाट ३२ अंकसहित तेस्रो स्थानमा रहेको छ ।
अंक तालिकाको शीर्ष स्थानमा अमेरिका ४३ अंकसहित रहेको छ भने स्कटल्यान्ड ३८ अंकसहित दोस्रो स्थानमा छ । ओमान ३१ अंकसहित चौथो स्थानमा छ । ओमानलाई उछिनेर शीर्ष चारमा पुग्न नेपालले बाँकी खेलमध्ये कम्तीमा चार खेल जित्नुपर्ने अवस्था रहेको छ। क्यानडा २४ अंकसहित सातौँ तथा युएई १४ अंकसहित पुछारमा रहेको छ ।
प्रतिक्रिया