सुनसरी घटनापछि विराटनगरका केही विद्यालय आज बन्द

काठमाडौं । सुनसरीको देवानगञ्ज-३ कप्तानगन्जमा भएको घटनापछि उत्पन्न हुन सक्ने सम्भावित सुरक्षा जोखिमलाई मध्यनजर गर्दै विराटनगरका केही विद्यालय आज (साउन १२) बन्द गरिएका छन् ।

सुनसरी घटनाको विरोधमा विराटनगरमा समेत प्रदर्शन हुन थालेपछि केही सामुदायिक तथा निजी विद्यालयले पठनपाठन स्थगित गरेका हुन् ।

निजी तथा आवासीय विद्यालयहरूको छाता संगठन प्याब्सन मोरङले औपचारिक निर्णय नभए पनि विद्यालयहरूले स्वतःस्फूर्त रूपमा कक्षा सञ्चालन नगरेको जनाएको छ ।

यता, विराटनगर महानगरपालिकाले भने विद्यालय बन्द गर्ने कुनै आधिकारिक सूचना जारी नगरेको स्पष्ट पारेको छ । महानगरको शिक्षा महाशाखाका प्रमुख रामप्रसाद ढुंगेलका अनुसार विद्यालय बस सञ्चालनमा अवरोध हुन सक्ने सूचना पाएपछि केही विद्यालयले आफ्नै निर्णयमा पठनपाठन बन्द गरेका हुन् ।

आइतबार (साउन १०) राति सुनसरीको देवानगञ्ज गाउँपालिका–३ कप्तानगन्जमा दुई समूहबीच भएको तनाव नियन्त्रण गर्ने क्रममा नेपाल प्रहरी र सशस्त्र प्रहरी बलले गोली चलाएका थिए । प्रहरीको गोली लागेर २४ वर्षीय ओमप्रकाश मेहताको मृत्यु भएको थियो भने घटनामा अन्य केही व्यक्ति घाइते भएका छन् ।