काठमाडौं । स्पेनिस ला लिगाअन्तर्गत आइतबार राति सम्पन्न ‘मड्रिड डर्बी’मा एट्लेटिको मड्रिडले साविक विजेता रियल मड्रिडलाई २-१ गोल अन्तरले पराजित गरेको छ ।
दोस्रो हाफमा डिफेन्डर डिन ह्युइसेनले रातो कार्ड पाएपछि १० खेलाडीमा सीमित भएको रियल मड्रिडले चिरप्रतिद्वन्द्वी एट्लेटिकोलाई नतिजा सुम्पिएको हो ।
प्रतिस्पर्धात्मक खेलको पहिलो हाफमा दुवै टोलीले गोल गर्न सकेनन् । ५२ औँ मिनेटमा ह्युइसेनले रातो कार्ड पाएपछि रियल संकटमा परेको थियो । त्यसको एक मिनेटपछि प्राप्त पेनाल्टीमा एलेक्स ग्रिमाल्डोले गोल गर्दै ५३ औँ मिनेटमा एट्लेटिकोलाई सुरुआती अग्रता दिलाए ।
अग्रता लिएको छ मिनेटपछि नै एट्लेटिकोले दोस्रो गोल थप्यो । ५९ औँ मिनेटमा जियोभानी सिमेओनेको पासमा जोनाथन डेभिडले गोल गर्दै घरेलु टोलीको अग्रता २-० बनाए ।
दुई गोलले पछि परेको रियलका लागि एन्टोनिओ रुडिगरले ८९ औँ मिनेटमा गोल गर्दै अन्तर घटाए । बर्नाडो सिल्भाको पासमा रुडिगरले गोल गरे पनि रियललाई हारबाट जोगाउन त्यो पर्याप्त भएन ।
यससँगै एट्लेटिको मड्रिडले डर्बी भिडन्तमा महत्त्वपूर्ण तीन अंक जोड्दा रियल मड्रिडले पराजय बेहोरेको छ ।
प्रतिक्रिया