काठमाडौं । नाइजेरियाको दक्षिणी ओन्डो राज्यमा नाइजेरियाली वायुसेनाको विमान दुर्घटना हुँदा २५ जनाको मृत्यु भएको छ । वायुसेनाका अनुसार एटीआर-४२ विमानमा २० यात्रु र चालक दलका पाँच सदस्य सवार थिए ।
विमान नाइजेरियाको आर्थिक राजधानी लागोसका लागि नियमित उडानमा रहेको थियो । उडान भरेको केही समयपछि विमान राडारबाट सम्पर्कविहीन भएको अधिकारीहरूले बताएका छन् ।
खोजीका क्रममा विमानको भग्नावशेष ओन्डो राज्यको नदी किनारमा रहेको इग्बोकाडा सहरस्थित नौसैनिक अड्डानजिकै फेला परेको थियो । दुर्घटनामा विमानमा सवार सबै २५ जनाको मृत्यु भएको वायुसेनाले जनाएको छ ।
नाइजेरियाका नागरिक उड्डयनमन्त्री फेस्टस केयामोले सुरुमा विमानमा ३२ जना सवार रहेको बताएका थिए । तर, पछि नाइजेरियाली वायुसेनाले यात्रु र चालक दलका सदस्य गरी २५ जना मात्रै विमानमा रहेको स्पष्ट पारेको हो ।
वायुसेनाले दुर्घटनाको कारण र परिस्थितिबारे अनुसन्धान गर्न आदेश दिएको जनाएको छ । दुर्घटनापछि नाइजेरियाका राष्ट्रपति बोला टिनुबुले तीन दिनको राष्ट्रिय शोक घोषणा गरेका छन् ।
प्रतिक्रिया