काठमाडौं । उपराष्ट्रपतिका उम्मेदवार रामसहायप्रसाद यादवको उम्मेदवारी कायमै रहने भएको छ ।
राष्ट्रपति उपराष्ट्रपति निर्वाचनका लागि गठित निर्वाचन अधिकृतको कार्यालयले उपराष्ट्रपति पदका उम्मेदवार रामसहाय प्रसाद यादवको उम्मेदवारी कायमै रहने निर्णय गरेको हो ।
राष्ट्रपतिमा खसआर्य पुरुष निर्वाचित भैसकेका कारण उपराष्ट्रपतिमा महिला मात्र उम्मेदवार हुनुपर्ने दाबी गर्दै नेकपा एमालेका उम्मेदवार अष्टलक्ष्मी शाक्य र जनमत पार्टीका उम्मेदवार ममता झाले उजुरी दिएका थिए।
निर्वाचन अधिकृतको कार्यालयले भने संविधानको व्यवस्थाअनुसार महिला नै हुनुपर्ने नभएको भन्दै यादवको उम्मेदवारी खारेज गर्नुनपर्ने निर्णय गरेको हो । ‘रामसहाय यादवको उम्मेदवारी बदर भएन, चारैजनाको उम्मेदवारी कायमै रह्यो,’ सहायक निर्वाचन अधिकृत अमृताकुमारी शर्माले भनिन ।
यसअघि यादवले आफूविरुद्ध परेको उजुरीमा आजै बिहान जवाफ दिएका थिए ।
निर्वाचन अधिकृतको कार्यालयले उजुरी उपुर जाँचबुझ गरी आज मध्याह्न १२ बजेभित्र निर्णय गरेको हो । आजै साँझ ५ बजेभित्र उम्मेदवारको अन्तिम नामावली प्रकाशन गर्ने कार्यतालिका छ।
प्रतिक्रिया