काठमाडौं । संघीय संसद सचिवालयले समाजवादी पार्टीकी सांसद सरिता गिरीको सांसद पद खारेज गरेको छ ।
संसद सचिवालयका महासचिव भरतराज गौतमले गिरीलाई पदबाट हटाएको र उक्त पद रिक्त भएको सूचना प्रकाशित गरेका छन् ।
समाजवादी पार्टीले गिरीलाई सांसद पदबाट हटाउन आग्रह गरेपछि संसद सचिवालयले गिरीको पद खारेज गरेको हो ।
पार्टीको ह्वीप उल्लंघन गरेको आरोपमा समाजवादी पार्टीले गिरीलाई सांसद पद र पार्टीको साधारणसदस्यबाट समेत हटाउने निर्णय गरेको थियो ।
भारतले अतिक्रमण गरेको लिम्पियाधुरा–कालापानी क्षेत्रलाई समेटेर नयाँ नक्शा जारी गरेपछि गिरीले त्यसको विरोध गरेकी थिइन । नयाँ नक्शालाई संवैधानिक अंग बनाउन सरकारले ल्याएको संविधान संशोधनको प्रस्तावमाथि पार्टी निर्णय विपरित गिरीले संशोधन प्रस्ताव दर्ता गराएकी थिइन ।
समाजवादी पार्टीले गिरीले पार्टी र संसदीय दलको निर्देशन पालना नगरेर गम्भीर अनुशासन उल्लंघन गरेको निस्कर्ष निकालेको थियो ।
प्रतिक्रिया