पाल्पाको जोर्तेमा मोटरसाइकल दुर्घटना हुँदा एकजनाको मृत्यु, एकजना घाइते

पाल्पा । पाल्पामा आइतबार मध्यराति मोटरसाइकल दुर्घटना हुँदा एक जनाको मृत्यु भएको छ ।

तानसेन-तम्घास सडक अन्तर्गत अर्गली-जोर्ते खण्डमा अर्गली तर्फ जाँदै गरेको लु ४२ प ६७०९ नम्बरको मोटरसाइकल भित्तामा ठोक्किएर दुर्घटना हुँदा एकजनाको मृत्यु भएको हो । सो दुर्घटनामा एकजना घाइते भएका छन् ।

दुर्घटनामा सल्यानको कालीमाटी गाउँपालिका वडानम्बर २ का अन्दाजी ३० वर्षीय नरेश घर्ती मगरको मृत्यु भएको छ भने मोटरसाइकलको पछाडि बसेका नवलपरासी सरावल गाउँपालिका-१ का २८ वर्षीय प्रकाश थारू घाइते भएको प्रहरीले जनाएको छ।

दुर्घटनापछि तानसेनस्थित युनाइटेड मिसन अस्पतालमा चिकित्सकले घर्तीलाई मृत घोषणा गरेका थिए ।

घाइते थारुको मिसन अस्पतालमा उपचार भइरहेको जिल्ला प्रहरी कार्यालय पाल्पाका सूचना अधिकारी वीरेन्द्र थापाले जानकारी दिए ।

आइतबार राति साढे १ बजे भएके दुर्घटना बारे थप अनुसन्धान जारी रहेको प्रहरीले जनाएको छ ।