जनकपुर । नेकपा एमालेका सचिव रघुवीर महासेठले पूर्वराष्ट्रपति विद्यादेवी भण्डारी र पार्टी अध्यक्ष केपी शर्मा ओलीबीच कुनै मतभेद नरहेको दाबी गरेका छन्।
आइतबार जनकपुरधाममा सञ्चारकर्मीहरूसँग कुरा गर्दै महासेठले हाल मिडियामा भण्डारी र ओलीबीच मतभेद भएको र पार्टीभित्र समूहबन्दी भएको भनेर आउने खबरहरूमा कुनै सत्यता नरहेको बताए।
उनले भने, “बजारमा हल्ला चलेको छ कि अध्यक्ष ओली र पूर्वराष्ट्रपति भण्डारीबीच दूरी बढेको छ, कार्यकर्ताहरू कित्ताकाटमा लागेका छन् भन्ने तर ती कुरा बिल्कुलै सत्य होइनन्। दुबैबीच कुनै अन्तरविरोध छैन।”
महासेठले भने, “यदि विद्या भण्डारी फेरि सक्रिय राजनीतिमा आउनुहुन्छ भने त्यो अध्यक्ष ओलीकै सहमति र प्रस्तावमा हुनेछ।”
पूर्वराष्ट्रपति भण्डारीले असार १४ गते मदन भण्डारीको ७४औँ जन्मजयन्तीको अवसरमा राष्ट्रिय सभागृहमा आयोजित कार्यक्रममा पार्टीको राजनीतिमा फर्किएको घोषणा गरेकी थिइन्।
यसपछि उनी एमालेको आगामी महाधिवेशनमा अध्यक्ष पदमा उम्मेदवार बन्ने चर्चा चर्किएको छ।
विद्या भण्डारी राष्ट्रपति हुनुअघि एमालेको उपाध्यक्षको जिम्मेवारीमा थिइन् । उनी झन्डै १० वर्षसम्म औपचारिक राजनीतिबाट अलग थिइन्।
प्रतिक्रिया