युद्धविराम र बन्धक रिहाइको नयाँ प्रस्तावमा हमास सहमत

काठमाडौं । गाजामा युद्धविराम र इजरायली बन्धकहरूको रिहाइसम्बन्धी नयाँ प्रस्तावमा हमास सहमत भएको छ । प्यालेस्टिनी सशस्त्र समूह हमासले मध्यस्थकर्ताहरूले अघि सारेको प्रस्ताव स्वीकार गरेको बीबीसीलाई दिएको प्रतिक्रियामा पुष्टि गरेको हो ।

इजिप्ट र कतारको पहलमा तयार भएको यो प्रस्ताव अमेरिकी राजदूत स्टिभ विटकफले जुन महिनामा प्रस्तुत गरेको रूपरेखामा आधारित रहेको बताइएको छ । प्रस्तावअनुसार सुरुवाती चरणमा ६० दिनका लागि युद्धविराम हुनेछ । त्यसपछि हमासले बाँकी रहेका ५० इजरायली बन्धकलाई दुई चरणमा रिहा गर्ने बताइएको छ, जसमा करिब २० जना जीवित हुने अपेक्षा गरिएको छ ।

यसपछि स्थायी युद्धविरामको विषयमा थप वार्ता अघि बढाइनेछ । यद्यपि, इजरायलले औपचारिक प्रतिक्रिया दिएको छैन । गत हप्ता मात्र इजरायली प्रधानमन्त्री बेन्जामिन नेतान्याहूले सबै बन्धकहरूलाई एकैपटक रिहा गरे मात्र सम्झौता गर्ने संकेत दिएका थिए ।