हेटौंडा । बागमती प्रदेशसभाका सभामुख भवनकुमार पाठकले पदबाट राजीनामा दिएका छन् । जेनजी आन्दोलन चर्किएपछि भदौ २४ गते सामाजिक सञ्जालमार्फत राजीनामा घोषणा गरेका पाठकले बुधबार (असोज १ गते) औपचारिक पत्रसहित उपसभामुख अप्सरा चापागाईंलाई राजीनामा बुझाएका हुन् ।
राजीनामा पत्रमा उनले लेखेका छन्, “नेपालको संविधान र प्रदेशसभा नियमावली २०७४ बमोजिम बागमती प्रदेश सभाको सभामुख पदबाट राजीनामा गरेको छु । राष्ट्र रोइरहेको अवस्थामा नेपाली जनताको चाहना र युवा पुस्ताको भावना विपरीत पदमा बसिरहन अनुचित ठानेँ ।”
यसअघि भदौ २४ गते राप्रपाबाट निर्वाचित प्रतिनिधिसभा र प्रदेशसभा सदस्यहरूले सामूहिक राजीनामा दिने घोषणा गरेपछि पाठकले पनि सभामुख पदबाट राजीनामा दिने निर्णय गरेका थिए । तर कानुनी प्रक्रिया अपुरो भएकाले औपचारिक रूपमा पत्र बुझाउन ढिलाइ भएको उनले स्पष्ट पारेका छन् ।
पाठक राप्रपाबाट बागमती प्रदेशसभाको सभामुख बनेका थिए । जेनजी आन्दोलनकै क्रममा तोडफोड र आगजनीबाट प्रदेशसभाको नयाँ र पुरानो दुवै भवनसहित विद्युतीय उपकरण जलेर ध्वस्त भएको छ ।
प्रतिक्रिया