बुटवल । विजयादशमीको अवसरमा जी-ट्वान्टी फाईभ क्लब, बुटवलले आयोजना गरेको उपमहानगर वडास्तरीय सेभेन ए साईड भेट्रान फुटबल प्रतियोगिताअन्तर्गत शुक्रबार फाइनल खेलअघि दुई मैत्रीपूर्ण खेल सम्पन्न भएको छ ।
बुटवलस्थित एन्फा टेक्निकल सेन्टरको मैदानमा बिहान भएको मैत्रीपूर्ण खेलमा नेपाल पत्रकार महासंघ रुपन्देही विजयी रह्यो । महासंघले शैक्षिक परामर्शदाता व्यवसायी रुपन्देहीलाई १-० गोल अन्तरले पराजित गरेको हो । प्रतिस्पर्धात्मक खेलको पहिलो हाफ गोलरहित बराबरीमा रोकिएको थियो । दोस्रो हाफमा डि.बी. सुस्लिङले गरेको गोल नै निर्णायक बन्यो ।
त्यसैगरी आयोजक जी ट्वान्टी फाईभ क्लब, बुटवल र बैंकरहरूको समूहबीच भएको खेलमा आयोजक टोली २-१ ले विजयी बन्यो । खेलपछि एक कार्यक्रममा सहभागी टोलीलाई आयोजक क्लबका अध्यक्ष जगदिश न्यौपाने र खेल संयोजक रमेश कुमार जोशीसहितको उपस्थितिमा पुरस्कृत गरिएको थियो ।
भेट्रान फुटबल प्रतियोगिताको फाइनल खेल शुक्रबार अपराह्न ३ बजेदेखि हुनेछ । उपाधिका लागि बुटवल-६ र बुटवल-११ आमनेसामने हुनेछन् । विजेताले उपाधिसहित नगद ५५ हजार ५५५ रुपैयाँ प्राप्त गर्नेछन् भने उपविजेताले २५ हजार ५५५ रुपैयाँसहित ट्रफी, मेडल र प्रमाणपत्र पाउने आयोजक अध्यक्ष न्यौपानेले जानकारी दिए ।
प्रतिक्रिया