नेपालगन्ज । रियालिटी शो एक्टिङ स्टार सिजन-१ का विजेता नविना रानाभाटलाई गृहनगर नेपालगन्जमा भब्य स्वागत गरिएको छ । उपाधी जितेपछि पहिलो पटक गृहनगर नेपालगन्ज आएकी उनलाई शुक्रबार बिहान नेपालगन्जमा बधाई सहित स्वागत गरिएका हो ।
बाजागाजा सहित बिमानस्थल लिन पुगेका शुभचिन्तक र कलाकर्मीहरुले बिमानस्थलबाट नेपालगन्जसम्म पुर्र्याएका थिए । बाँके कला केन्द्रको अगुवाईमा नेपालगन्जका कलाकार, नागरिक अगुवा लगायतले रानाभाटको स्वागत गरेका थिए ।
नगरपरिक्रमा पछि आयोजित बधाई तथा शुभकामना कार्यक्रममा बोल्ने बक्ताहरुले नबिनाले अभिनयको माध्यमबाट बाँकेको नाम रोशन गराएको बताए । उनीहरुले सयौं प्रतिस्पर्धीहरुलाई पछि पार्दै बाँकेकी चेलीले उपाधि जित्नु सबै बाँकेबासीले गर्व गर्ने बिषय भएको बताए ।
कार्यक्रममा बोल्दै नपालगन्ज उपमहानगरकी निवर्तमान नगर उपप्मुख उमा थापाले अभिनयको माध्यमबाट बाँके जिल्लाबासी सहित पश्चिम नेपाललाई खुसी दिएकोमा नबिनालाई बधाई दिइन् । उनले नबिनाको जितमा उनको मातापिताको विशेष योगदान रहेको उल्लेख गर्दै नबिनाको बाबा र आमाको प्रशंसा गरिन् ।
नबिनाका पिता भीम रानाभाटले नबिनालाई उपाधि दिलाउन योगदान गर्ने बाँकेबासी सहित देशभरीका दर्शक र शुभचिन्तकहरु प्रति आभार प्रकट गरे । सबैको हौसला र प्रयासले नेपालगन्ज र बाँकेले सफलता पाएको उनको भनाई छ ।
बाँके कला केन्द्रका अध्यक्ष सुन्दर गुरुङले बाँकेको कलाले देशमै उत्कृटताको उपाधि जित्नु बाँकेका सम्पूर्ण कलाकारको लागि गर्वको विषय भएको बताए । बाँके जिल्ला कला र संस्कृतिमा कोही भन्दा कम नभएको उदाहरण नबिनाले पुष्टी गरेको उनले बताए ।
कार्यक्रममा पत्रकार शरण कर्माचार्य, नागरिक अगुवा कृष्ण श्रेष्ठ, पर्यटन अभियन्ता श्रीराम सिग्देललगायतले उपाधि जितेपछि त्यसलाई जोगाउने र थप सफलता पाउन नबिनाले थप प्रयास गर्नु पर्नेमा जोड दिए ।
प्रतिक्रिया