काठमाडौं । पारिश्रमिक लगायतका मागसहित आन्दोलनरत नर्सहरूको समस्या समाधानका लागि सरकारले सातै प्रदेशमा कार्यदल गठन गर्ने निर्णय गरेको छ ।
प्रधानमन्त्री तथा स्वास्थ्य तथा जनसंख्या मन्त्री सुशीला कार्कीले स्वास्थ्य मन्त्रालयका अतिरिक्त सचिव प्रा.डा. श्रीकृष्ण श्रेष्ठको नेतृत्वमा गठन गरेको उच्चस्तरीय समितिको आइतबार बसेको पहिलो बैठकले यो निर्णय गरेको हो ।
नेपाल नर्सिङ संघको संयोजकत्वमा सम्बन्धित प्रदेशका स्वास्थ्य मन्त्रालयका प्रतिनिधि, जिल्ला प्रशासन कार्यालयका अधिकारी तथा आन्दोलनरत नर्स प्रतिनिधि सम्मिलित कार्यदल सातै प्रदेशमा गठन गरिने समितिका सदस्य डा. अनुप बास्तोलाले जानकारी दिए । उनका अनुसार कार्यदलले स्थलगत अनुगमन गरी सुझावसहितको प्रतिवेदन पेस गर्नेछ ।
स्वास्थ्य मन्त्रालयको गुनासो सुनुवाइ एकाइका प्रमुखसमेत रहेका डा. बास्तोलाका अनुसार कार्यदलले प्रा.डा. श्रेष्ठ नेतृत्वको समितिसँग प्रत्यक्ष समन्वय गर्दै काम गर्नेछ ।
प्रधानमन्त्री कार्कीले आइतबार बिहान मन्त्रीस्तरीय निर्णयमार्फत नर्सिङ स्वास्थ्यकर्मीको सेवा र सुविधा सुधारसम्बन्धी अल्पकालीन तथा दीर्घकालीन सुझावसहितको कार्यान्वयन योजना प्रतिवेदन सात दिनभित्र पेस गर्न निर्देशन दिएकी थिइन् ।
सोही निर्देशनअनुसार आइतबार बसेको समितिको पहिलो बैठकले तिहार बिदाका अवधिमा भर्चुअल माध्यमबाट अध्ययन कार्य अगाडि बढाउने र सातै प्रदेशमा कार्यदल गठन गर्ने निर्णय गरेको हो। समितिको दोस्रो बैठक कात्तिक ९ गते बिहान ११ बजे बस्ने तय गरिएको छ ।
उक्त बैठकमा नेपाल मेडिकल तथा डेन्टल कलेज एसोसिएसनसहित निजी क्षेत्रका प्रतिनिधिलाई पनि अनिवार्य उपस्थित हुन भनिएको छ । समितिले तयार पारेको प्रतिवेदन मन्त्रिपरिषद्मा पेस गरिने स्वास्थ्य मन्त्रालयले जनाएको छ ।
प्रतिक्रिया