१० बजेसम्म सिमरा घटनाका दोषी पक्राउ नभए देशव्यापी आन्दोलन गर्ने सुदन गुरुङको चेतावनी

काठमाडौं । जेनजी आन्दोलनका अगुवा सुदन गुरुङले सिमरा घटनापछि जेनजी जिल्ला संयोजक सम्राट उपाध्यायमाथि हात उठाउने व्यक्तिलाई तत्काल कारबाही गर्न सरकारलाई चेतावनी दिएका छन् । उनले शुक्रवार बिहान १० बजेसम्ममा अभियुक्त पक्राउ नगरे देशव्यापी विरोध कार्यक्रम सुरु गर्ने घोषणा गरेका छन् ।

गुरुङले बिहीबार मध्यरात फेसबुकमा स्टाटस गर्दै भनेका छन्, “हाम्रो शान्तिपूर्ण प्रदर्शनमा आएर सिमराका जिल्ला संयोजक सम्राट उपाध्यायमाथि हात उठाउने मुख्य अभियुक्तलाई भोलि बिहान १० बजेसम्म पक्राउ गरिएन भने देशव्यापी विरोध सुरु गरिनेछ ।”

उनले सरकार र गृहमन्त्रीलाई लक्षित गर्दै आफ्नो ‘मौनतालाई कमजोरी नठान्न’ आग्रह गरेका छन् । गुरुङका अनुसार अब युवाहरू र देशभक्त नागरिकहरूको शक्तिले सडकबाट प्रतिक्रिया दिने वातावरण बनेको छ ।

सिमरामा भएको जेनजी आन्दोलनको प्रदर्शनका क्रममा सम्राट उपाध्यायमाथि कुटपिट भएको घटनापछि संगठनभित्र आक्रोश बढेको छ । गुरुङले दोषीलाई कारबाही नगरे आन्दोलन थप उग्र हुने संकेत दिएका छन् ।