वरिष्ठ गायक बम बहादुर कार्कीले चौतारीमा बसेर पिपलको पात फरर पारेपछि….

काठमाडौं । नेपाली लोक गायनमा मौलिकता हराएको भन्दै चिन्तित बनेका वरिष्ठ लोक गायक बम बहादुर कार्कीले एक पछि अर्को मौलिक नेपाली भाकाको गीत बजारमा ल्याउन थालेका छन् । तीजका अवसरमा परम्परागत शैलीमा बामरी तीजीगीत बजारमा ल्याएका वरिष्ठ गायक कार्कीले पुरानो आफ्नै गीत ‘पिपलु पातै फरर’ गीतको नयाँ भर्सन सार्वजनिक गरेका छन् ।

कार्कीको आफ्नै एकल आवाज र शब्द तथा संगीत रहेको गीतको भिडियो उनले आफ्नै युट्यूब च्यानलमार्फत सार्वजनिक गरेका हुन् ।

गोरखा म्युजिकले बजारमा ल्याएको नयाँ भर्सनको भिडियोमा कमल भुसाल चञ्चलले अभिनय गरेका छन् । पुरानो जमनामा रेडियोबाट बज्ने उक्त गीतलाई नयाँ भर्सनमा दर्शक स्रोता माझ ल्याएको गायक कार्कीले बताए । उनले तीजको भाकाको गीत बामरी बजारमा ल्याउंदा नै हरेक महिना नयाँ मौलिक शैलीको गीत बजारमा ल्याउने घोषणा गरेका थिए । कार्कीले लोकगीतको अस्तित्व बचाउन लोक भाका र लोक संस्कृतिको जगेर्ना आवश्यक रहेको बताए ।