काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन)ले सोमबार बिहानै जनकपुरधामस्थित ऐतिहासिक जानकी मन्दिरको दर्शन गरेका छन् । बिहान ६ बज्नुअगावै मन्दिर पुगेका बालेनले विधिपूर्वक पूजा-अर्चना गर्दै दर्शन गरेका हुन् ।
जानकी मन्दिर पुग्दा बालेनसँगै पूर्व सांसद अमरेशकुमार सिंह पनि एउटै पोशाकमा देखिएका थिए । बिहानको समयमै भए पनि मन्दिर परिसरमा बालेनका समर्थकहरूको उल्लेख्य उपस्थिति देखिएको थियो । समर्थकहरूले उनलाई स्वागत गर्दै शुभकामना दिएका थिए ।
बालेन रास्वपाले जनकपुरधाममा आयोजना गर्न लागेको चुनावी सभालाई सम्बोधन गर्न त्यहाँ पुगेका हुन् । फागुन २१ गते हुने प्रतिनिधिसभा निर्वाचनलाई लक्षित गर्दै रास्वपाले मधेश प्रदेश केन्द्रित सभा आयोजना गर्न लागेको पार्टीले जनाएको छ ।
आइतबार मात्रै काठमाडौं महानगरपालिकाको मेयर पदबाट राजीनामा दिएका बालेनले सोही दिन रास्वपाको केन्द्रीय कार्यालयमा पुगेर औपचारिक रूपमा पार्टीको जिम्मेवारी सम्हालेका थिए । त्यसपछि उनी चुनावी अभियानका क्रममा जनकपुरधाम पुगेका हुन् ।
मेयर पदबाट राजीनामा दिएर प्रत्यक्ष राष्ट्रिय राजनीतिमा सक्रिय बनेका बालेनको जनकपुर आगमन र धार्मिक स्थल दर्शनलाई आगामी चुनावी अभियानसँग जोडेर चासोका साथ हेरिएको छ ।
प्रतिक्रिया