काठमाडौं । राष्ट्रिय स्वतन्त्र पार्टीको चुनावी अभियानका क्रममा वरिष्ठ नेता बालेन साहसँगै अछाम पुगेका उनका सहयोगी दिनेश सिटौला शुक्रबार बिहान एक्कासि बेहोस भएका छन् । उनी अछाम सदरमुकाम मंगलसेनमा रहेको साहको टोलीसँगै रहँदा अचानक अचेत अवस्थामा पुगेका हुन् ।
४३ वर्षीय सिटौलाको अवस्था गम्भीर भएपछि उद्धारका लागि सुर्खेतबाट नेपाली सेनाको हेलिकप्टर अछाम पठाइएको छ । हालसम्म उनको होस नआएको जनाइएको छ ।
अछामका प्रमुख जिल्ला अधिकारी यज्ञबहादुर बुढाका अनुसार सिटौलालाई प्रारम्भिक उपचारपछि हेलिकप्टरमार्फत काठमाडौं पठाउने तयारी गरिएको छ । “स्वास्थ्य अवस्था सामान्य नभएकाले थप उपचारका लागि काठमाडौं लैजाने निर्णय गरिएको हो,” उनले बताए ।
नुवाकोट घर भएका सिटौला बालेन साहको चुनावी अभियान टोलीका सक्रिय सदस्य रहेको जनाइएको छ । सिटौलाको उद्धारपछि बालेन साहको टोलीले भने मध्यपहाडी राजमार्ग हुँदै दैलेखतर्फ जाने कार्यतालिका रहेको प्रमुख जिल्ला अधिकारी बुढाले जानकारी दिए ।
सिटौलाको स्वास्थ्य अवस्थाबारे थप विवरण आउन बाँकी रहेको छ भने चिकित्सकीय परीक्षणपछि मात्र बेहोस हुनुको कारण खुल्ने बताइएको छ ।
प्रतिक्रिया