काठमाडौं । पूर्वमन्त्री जितेन्द्र देवले नेकपा एमाले परित्याग गरेका छन्।
उनले आज सार्वजनिक विज्ञप्ति जारी गर्दै एमालेबाट अलग भएको घोषणा गरेका हुन्।
विज्ञप्तिमा पार्टीलाई व्यक्तिवाद र देवत्वकरणतर्फ उन्मुख गराइएको, स्वेच्छाचारी तथा विभेदकारी शैलीमा सञ्चालन गरिएको भन्दै त्यस्तो विचार, नीति र व्यवहारप्रति गहिरो असहमति जनाउँदै एमाले त्यागेको उल्लेख गरिएको छ।
सप्तरीका देव बारम्बार पार्टी परिवर्तन गर्ने नेतामा पर्छन् । एमालेबाटै राजनीति सुरु गरेका देव मधेशी जनअधिकार फोरम, लोकतान्त्रिक फोरम, नेपाली कांग्रेस हुँदै २०८१ सालमा पुनः एमालेमा फर्किएका थिए । उनी फोरम लोकतान्त्रिकबाट संविधानसभा सदस्य समेत बनेका थिए । फोरम लोकतान्त्रिक नेपाली कांग्रेसमा विलय भएपछि देव पनि कांग्रेसमा समाहित भएका थिए। कांग्रेसबाट उनी राष्ट्रियसभा सदस्यसमेत बनेका थिए।
२० फागुन २०८० मा राष्ट्रियसभा सदस्यको कार्यकाल समाप्त भएपछि देव १७ असार २०८१ मा पुनः एमालेमा फर्किएका थिए।
तर केही समयमै उनले पार्टीको नीति र अभ्याससँग असहमति जनाउँदै फेरि एमाले परित्याग गरेका छन्।
प्रतिक्रिया