६ देशका राजदूत फिर्ता गर्ने सरकारको निर्णय

काठमाडौं । सरकारले विभिन्न मुलुकमा राजनीतिक नियुक्तिका आधारमा खटाइएका ६ जना राजदूतलाई फिर्ता बोलाउने निर्णय गरेको छ । मन्त्रिपरिषद्को पछिल्लो बैठकले अघिल्लो सरकारको पालामा नियुक्त भएका राजदूतलाई फिर्ता बोलाउने निर्णय गरेको हो ।

फिर्ता बोलाइएका राजदूतहरूमा शंकरप्रसाद शर्मा (भारत), चित्रलेखा यादव (अस्ट्रेलिया) र शिवमाया तुम्बाहाङ्फे (दक्षिण कोरिया) रहेका छन् ।

त्यसैगरी पूर्णबहादुर नेपाली (श्रीलंका), सुम्निमा तुलाधर (डेनमार्क) र कपिल श्रेष्ठ (दक्षिण अफ्रिका) लाई पनि सरकारले फिर्ता बोलाएको छ । सरकार परिवर्तनसँगै अघिल्लो कार्यकालमा नियुक्त भएका राजदूतलाई फिर्ता बोलाउने अभ्यासलाई निरन्तरता दिँदै यो निर्णय गरिएको बताइएको छ ।

परराष्ट्र मन्त्रालयका अनुसार फिर्ता बोलाइएका राजदूतलाई बाँकी कार्यकाल छोडेर स्वदेश फर्कन निश्चित समयसीमा प्रदान गरिनेछ । साथै, रिक्त हुने कूटनीतिक नियोगहरूमा नयाँ राजदूत नियुक्त गर्ने प्रक्रिया छिट्टै सुरु गरिने जनाइएको छ ।