काठमाडौं । साउदी अरेबिया सरकारले आफ्नो कारागारमा रहेका ३३ जना नेपाली नागरिकलाई आममाफी दिएको छ। रमजानको अवसर पारेर साउदी सरकारले उनीहरूको बाँकी कैद सजाय माफ गरेको हो।
परराष्ट्र मन्त्रालयले सोमबार विज्ञप्ति जारी गर्दै ३३ नेपाली कैदीलाई आममाफी प्रदान गरेकोमा साउदी अरेबिया सरकारप्रति आभार व्यक्त गरेको छ। मन्त्रालयले साउदी सरकारको यस निर्णयलाई दुई देशबीचको मैत्रीपूर्ण सम्बन्ध र आपसी सद्भावको प्रतीकका रूपमा लिएको जनाएको छ।
मन्त्रालयका अनुसार रियादस्थित नेपाली दूतावासको पहल र अनुरोधपछि साउदी सरकारले नेपाली कैदीहरूलाई आममाफी दिने निर्णय गरेको हो।
आममाफी प्राप्त गरेका नेपाली नागरिकलाई साउदी अरेबियाको कानुनी तथा प्रशासनिक प्रक्रिया पूरा भएपछि चरणबद्ध रूपमा नेपाल फर्काइने परराष्ट्र मन्त्रालयले जनाएको छ।
नेपाल सरकारले विदेशमा रहेका नेपाली नागरिकको हकहित र संरक्षणका लागि सम्बन्धित मुलुकसँग निरन्तर समन्वय गर्दै आएको उल्लेख गर्दै मन्त्रालयले आगामी दिनमा पनि यस्ता कूटनीतिक पहललाई निरन्तरता दिइने जनाएको छ।
प्रतिक्रिया