काठमाडौं । सुनसरीको देवानगञ्ज गाउँपालिका-३, कप्तानगञ्जमा प्रहरीको गोली लागेर घाइते भएका रविन्द्र मेहेताको उपचारका क्रममा मृत्यु भएपछि उनका परिवारले सरकारसँग सम्झौता नभएसम्म शव नबुझ्ने अडान लिएको छ ।
परिवारका सदस्यले गृहमन्त्री स्वयं उपस्थित भएर आफ्ना माग सम्बोधन गर्नुपर्ने र त्यसपछि मात्रै त्रिभुवन विश्वविद्यालय शिक्षण अस्पतालबाट शव उठाउने बताएका छन् । हाल परिवारका सदस्य तथा आफन्त अस्पतालको सघन उपचार कक्ष (आईसीयू) बाहिर बसेर सरकारसँगको वार्ताको प्रतीक्षा गरिरहेका छन् ।
अस्पतालमा आफन्त तथा शुभेच्छुकहरूको उपस्थिति पनि बढ्दै गएको छ । उनीहरूले सरकारसँग सहमति नभएसम्म अस्पताल नछाड्ने बताएका छन् ।
२२ वर्षीय मेहेताको उपचारका क्रममा मंगलबार बिहान त्रिभुवन विश्वविद्यालय शिक्षण अस्पतालमा निधन भएको थियो । उनी सुनसरीको देवानगञ्ज गाउँपालिका-३, कप्तानगञ्जमा भएको घटनामा प्रहरीको गोली लागेर घाइते भएका थिए ।
यसअघि सोही घटनामा मृत्यु भएका अन्य तीन जनाका परिवारसँग सरकारले सहिद घोषणा, आर्थिक सहायता तथा परिवारका एक सदस्यलाई रोजगारी उपलब्ध गराउनेलगायत विषयमा सहमति गरेको थियो । रविन्द्र मेहेताका परिवारले पनि समान प्रकृतिको सम्झौता भएपछि मात्र शव बुझेर अन्त्येष्टि गर्ने अडान दोहोर्याएका छन् ।
प्रतिक्रिया