बोगोटा । पश्चिम कोलम्बियामा गएको ७.४ म्याग्निच्युडको शक्तिशाली भूकम्पमा परी कम्तीमा १११ जनाको मृत्यु भएको छ भने ८७ जना घाइते भएका छन् ।
कोलम्बियन जियोलोजिकल सर्भिसका अनुसार सोमबार गएको उक्त भूकम्प पछिल्लो एक दशकयताकै शक्तिशाली हो । भूकम्पका कारण विभिन्न शहरमा दर्जनौँ भवन भत्किएका छन् । भग्नावशेषमा मानिसहरू फसेको आशंका गरिएको छ भने राजधानी बोगोटासम्मका बासिन्दा घरबाट बाहिर निस्केर खुला स्थानमा पुगेका छन् ।
भूकम्पपछि नवनियुक्त राष्ट्रपति एबेलार्डो डे ला एस्प्रिएलाले उद्धार तथा राहत कार्यलाई तीव्रता दिन राष्ट्रिय संकटकाल घोषणा गरेका छन् । उनले प्रभावित क्षेत्रको निरीक्षण गर्ने बताउँदै विपद्को समयमा नागरिकलाई एक्लो नछाड्ने र पूर्ण क्षमताका साथ उद्धार तथा राहतमा जुट्ने बताएका छन् ।
अमेरिकी भूगर्भ सर्भिसका अनुसार भूकम्पको केन्द्रविन्दु राजधानी बोगोटाबाट करिब ४०० किलोमिटर पश्चिममा रहेको छोको क्षेत्रको सान जोसे डेल पाल्मार नजिक १०७ किलोमिटर गहिराइमा रहेको थियो । भूकम्पपछि २.८ र ४.८ म्याग्निच्युडका दुई परकम्पसमेत महसुस गरिएको छ । अमेरिकी सुनामी चेतावनी प्रणालीले भने सुनामीको जोखिम नरहेको जनाएको छ ।
भूकम्पका कारण मनिजालेस, क्विब्डो, आर्मेनिया, कार्टागो, बुएनाभेन्चुरा र पेरेरा विमानस्थलका उडान स्थगित गरिएका छन् । कोलम्बियन फुटबल संघले पनि आगामी लिगका खेलहरू स्थगित गरेको छ ।
प्रशान्त महासागरीय तटीय क्षेत्रमा पर्ने छोको कोलम्बियाको गरिब तथा दुर्गम क्षेत्रमध्ये एक हो । अधिकांश ग्रामीण क्षेत्रमा डुङ्गा वा विमानबाट मात्रै पुग्न सकिने भएकाले भूकम्पबाट भएको क्षति र मानवीय हताहतीको पूर्ण विवरण संकलन गर्न उद्धारकर्मीलाई कठिनाइ भइरहेको छ ।
यसैबीच अमेरिका र युरोपेली सङ्घले कोलम्बियालाई आवश्यक सहयोग उपलब्ध गराउन तयार रहेको जनाएका छन् । युरोपेली सङ्घकी प्रमुख उर्सुला भोन देर लेयनले उद्धार तथा राहत कार्यमा सहयोग पुर्याउन स्याटेलाइट सेवा ‘कोपरनिकस’ परिचालन गरिएको जानकारी दिएकी छन् ।
प्रतिक्रिया