काठमाडौं । त्रिभुवन विश्वविद्यालय (त्रिवि)को शिक्षाध्यक्ष (रेक्टर)मा प्राडा अञ्जना सिंह र रजिस्ट्रारमा प्रा रवीन्द्र शिवाकोटी नियुक्त भएका छन् ।
त्रिवि उपकुलपति प्राडा भोला थापाको सिफारिसका आधारमा विश्वविद्यालयका कुलपति तथा प्रधानमन्त्री बालेन्द्र शाहले मंगलबार सिंह र शिवाकोटीलाई क्रमशः शिक्षाध्यक्ष र रजिस्ट्रारमा नियुक्त गरेका हुन् ।
शिक्षा मन्त्रालय स्रोतका अनुसार नवनियुक्त शिक्षाध्यक्ष सिंह र रजिस्ट्रार शिवाकोटीलाई मंगलबार दिउँसो ३ बजे मन्त्रालयमा नियुक्तिपत्र प्रदान गरिनुका साथै शपथ गराउने कार्यक्रम छ ।
शिवाकोटी त्रिभुवन विश्वविद्यालयको शिक्षा शास्त्र संकायका प्राध्यापक हुन् भने सिंह विज्ञान संकायकी प्राध्यापक हुन् ।
यसअघि त्रिविको निमित्त रजिस्ट्रारको जिम्मेवारी प्राडा महानन्द चालिसे र शिक्षाध्यक्षको जिम्मेवारी प्राडा शंकर खनालले सम्हाल्दै आएका थिए ।
सरकारले गत वैशाखमा अध्यादेशमार्फत त्रिभुवन विश्वविद्यालयका तत्कालीन पदाधिकारीहरूलाई पदमुक्त गरेको थियो । त्यसपछि गत असारमा उपकुलपतिमा प्राडा भोला थापा नियुक्त भए पनि शिक्षाध्यक्ष र रजिस्ट्रार पद लामो समयदेखि रिक्त रहँदै आएको थियो ।
नयाँ पदाधिकारी नियुक्तिसँगै त्रिभुवन विश्वविद्यालयको प्रशासनिक तथा शैक्षिक नेतृत्वले पूर्णता पाएको छ ।
प्रतिक्रिया