जुम्लाको गोठीगाउँमा भीषण आगलागी, ३५ घर जलेको प्रारम्भिक अनुमान

जुम्ला । जुम्लाको तिला गाँउपालिकामा आगलागी हुँदा ३५ घर जलेको छ । मंगलबार सांझ लागेको भीषण आगलागी बाट ३५ घर जलेको प्रारम्भिक खबर आएको जिल्ला प्रशासन कार्यालय जुम्लाले जनाएको छ । मंगलवार साँझ जिल्लाको तिला गाउँपालिका गोठीमा स्थानीयवासीको घरमा लागेको आगो फैलंदै जाँदा ठूलो क्षती भएको बताईएको छ ।

स्थानीयबासीले ३५ घर जलेको खबर गरेपनि कति घर जल्यो भन्ने पुष्टि नभएको जुम्लाका प्रमुख जिल्ला अधिकारी भुपेन्द्र थापाले खबरकुरालाई जानकारी दिए । ‘सशस्त्र, जनपद र स्थानीय रारालिही चौकीका प्रहरीहरु केहिबेर अगाडी घटनास्थल पुगेका छन् । उनीहरुले रिपोर्ट गरेपछि क्षेतीको वास्तविक विवरण आउला’, प्रजिअ थापाले भने ।

सदरमुकामबाट घटनास्थल पुग्न चार घण्टा लाग्छ । आगलागीको कारण पनि स्पष्ट हुन नसकेको प्रजिअ थापाले भने । घटनास्थल जुम्लाका रारालिही प्रहरी चौकी अन्तर्गत पर्दछ ।