काठमाडौं । नेकपा महासचिव नेत्र विक्रम चन्दले राजनीतिक भेटघाटलाई तिब्रता दिइरहेका छन् ।
महासचिव चन्दले शुक्रबार बिहान जनता समाजवादी पार्टीका संघीय परिषद् अध्यक्ष एवं पूर्वप्रधानमन्त्री डा. बाबुराम भट्टराईसँग भेट गरेका छन् ।
चन्दले अर्का नेता धर्मेन्द्र बाँस्तोलालाई लिएर भट्राईलाई भेट्न उनको निवास टोखा पुगेका थिए । ओली सरकारसँग तीन बुँदे सहमति गरेर खुला राजनीतिमा आएका चन्दले ओलीको सत्ताबाट बहिर्गमनलगत्तै आफ्ना युद्धकालका पूर्वसहकर्मीहरु र अन्य नेताहरुसँग भेट सुरु गरेका थिए । त्यसैक्रममा उनले दुई दिनअघि माओवादी केन्द्रका अध्यक्ष पुष्पकमल दाहाल प्रचण्डसँग भेट गरेका थिए । बिहीबार बिहान एमाले वरिष्ठ नेता माधवकुमार नेपालसँग भेट गरेका चन्दले आज भट्टराईसँग भेट गरेका हुन् । नेपालसँगको भेटमा प्रचण्ड समेत मिसिएका थिए ।
प्रचण्डसँगको भेटमा चन्दले माओवादी पृष्ठभूमिका दलहरुबीच एकताको प्रस्ताव गरेका थिए । कम्युनिष्ट शक्तिबीच एकताको वकालत गर्दै आएका प्रचण्डसँग चन्दले गरेको एकता प्रस्तावलाई पूर्व माओवादी घटकहरुले सकारात्मक रुपमा लिएका छन् । चन्दले आज युद्धकालदेखि २०७२ सम्म माओवादीको वरिष्ठ नेता रहँदै आएका डा. भट्राईसँग सम्वाद गरेका छन् ।
प्रतिक्रिया