बुटवल । लुम्बिनी प्रदेशका मुख्यमन्त्री शंकर पोखरेलले आफ्नो पदबाट राजीनामा दिएका छन् । पोखरेल विरुद्ध परेको अविश्वासको प्रस्ताव संसदको विशेष अधिवेशनबाट पास हुने देखिएपछि उनले राजीनामा दिएका हुन् । मुख्यमन्त्री पोखरेले प्रदेश प्रमुख अमिक शेरचन समक्ष राजीनामा बुझाएका छन् ।
राजीनामा दिनु अघि पोखरेलले आजै बिहान मुख्यमन्त्रीको सरकारी निवासमा संसदीय दल र मन्त्रिरिषदको बैठक बोलाएका थिए ।
संसदमा बहुमत नपुग्ने निश्चित भएपछि अदालतको अन्तरिम आदेशबाट अधिवेशन रोकिने अपेक्षा सहित काठमाडौं पुगेका पोखरेल अनुकुल सर्वोच्चबाट पनि नहुने देखिएपछि उनी राजीनामामो मनस्थितीमा पुगेका थिए । पोखरेलले शुरुमा अधिवक्ता प्रवेश केसी मार्फत र पछि पूर्वमन्त्री लिला गिरी मार्फत सर्वोच्चमा रिट हाल्न लगाएकोमा सर्वोच्चले अधिवक्ता केसीको रिटमा दरपीठ गरिदिएको थियो भने गिरीको रिट हेर्न नभ्याउनेमा रोखिएको छ ।
प्रदेश प्रमुखको आह्वानमा आज विशेष अधिवेशन हुने निश्चित भएपछि मंगलबार मात्र मुख्यमन्त्री सहितका एमालेका प्रदेश नेताहरु बुटवल फर्केका थिए ।
मुख्यमन्त्री पोखरेलले राजीनामा दिएसँगै माओवादी केन्द्रका संसदीयदलका नेता कुल प्रसाद केसी लुम्बिनी प्रदेशका मुख्यमन्त्री हुने भएका छन् । सम्भवत आज साँझ सम्ममा प्रदेश प्रमुख शेरचनले नयाँ सरकार गठनकालागि प्रस्ताव आह्वान गर्ने छन् ।
पोखरेल सरकारको विपक्षी गठवन्धनमा नेपाली कांग्रेस, माओवादी केन्द्र, जनता समाजवादी पार्टी र राष्ट्रिय जनमोर्चा छन् ।
प्रदेशसभामा हाल ८० जना सांसद बहाल रहेकोमा बहुमतका लागि ४१ सिट आवश्यक हुन्छ । तर सत्तारुढ दल एमालेसँग अहिले ३८ सांसद मात्रै छन् । विपक्षी गठवन्धनसँग कांग्रेसका १९, मामाओवादीका १८, जसपाका ३ र जनमोर्चाका १ गरी ४१ सांसद छन् ।
प्रतिक्रिया