काठमाडौं । सरकारले साफ उपविजेता नेपाली फुटबल टिमका खेलाडीलाई पाँच/पाँच लाख रूपैयाँ दिने भएको छ ।
आज (सोमबार) बसेको मन्त्रिपरिषद बैठकले प्रत्येक खेलाडीलाई ५-५ लाख र प्रशिक्षकहरूलाई प्रोत्साहनस्वरूप ३-३ लाख रूपैयाँ दिने निर्णय गरेको हो ।
सञ्चारमन्त्री ज्ञानेन्द्रबहादुर कार्कीले खेलाडी र प्रशिक्षकहरूलाई प्रोत्साहनस्वरूप सो रकम दिने निर्णय मन्त्रिपरिषदले गरेको जानकारी दिए ।
मन्त्रिपरिषद बैठकले मोहम्मद जयन्तीका अवसरमा भोलि (मंगलबार) मुस्लिम समुदायलाई सार्वजनिक बिदा दिने निर्णय पनि गरेको छ ।
बैठकले आबुधाबीमा हुन लागेको छैटौं मन्त्रिस्तरीय परामर्श बैठकमा सहभागी हुन श्रम, रोजगार तथा सामाजिक सुरक्षामन्त्रीलाई स्वीकृति दिने निर्णय गरेको पनि मन्त्री कार्कीले जानकारी दिए ।
बैठकले मन्त्रालयहरूमा स्थायी दरबन्दी सिर्जना गर्न स्वीकृति दिनुका साथै लोकसेवा आयोग तथा बढुवा समितिको सिफारिसबमोजिम राजपत्रांकित प्रथम श्रेणीका विभिन्न पदमा नियुक्ति गर्ने निर्णय पनि गरेको छ ।
प्रतिक्रिया