बुटवल । बिहीबार कोरोना भाइरसको संक्रमण देखिएका कपिलवस्तुका १६ र २२ वर्षका २ युवक भारतको मुम्बईबाट एक साताअघि लुकीछिपी जिल्ला आएको खुलासा भएको छ । उनीहरु नेपाल छिरेको थाहा भए लगत्तै दुबै जनालाई मायादेवी गाउँपालिका वडा नं. १ पकडीमा रहेको छत्रपाली तिर्थादेवी माविको क्वारेन्टाइनमा राखिएको थियो । उनीहरुलाई स्थानीयवासीले समातेर क्वरेन्टाइनमा राखेको कपिलवस्तुका प्रमुख जिल्ला अधिकारी दिर्घनारायण पौडेलले जानकारी दिनु भयो ।
उनीहरुको राष्ट्रिय जनस्वास्थ्य प्रयोगशाला काठमाडौंमा स्वाब परीक्षण गर्दा आज कोरोना भाइरसको पोजेटिभ रिपोर्ट आएको थियो ।
जिल्ला प्रशासन कार्यालय कपिलवस्तुका अनुसार संक्रमित दुवै जनाको स्वास्थ्यअवस्था अहिले सामान्य रहेको छ भने उनीहरुलाई बुटवलको आइसोलेसन अस्पतालमा ल्याउने तयारी भइरहको छ । दुई संक्रमित भेटिए लगत्तै शुक्रबार बिहानैदेखि कन्ट्याक्ट ट्रेसिङको तयारी गरिएको प्रदेश स्वास्थ्य निर्देशनालयले जनाएको छ ।
प्रदेश ५ का १२ जिल्ला मध्य तीन जिल्लामा कोरोना संक्रमित भेटिएको हो ।
प्रतिक्रिया