तनहुँको बन्दिपुरमा भएको जिप दुर्घटनामा मृत्यु हुनेको संख्या ६ पुग्यो

तनहुँ । तनहुँको बन्दीपुर गाउँपालिका-६ धरमपानी हटिया भएको जिप दुर्घटनामा मृत्यु हुनेको संख्या ६ पुगेको छ ।

शुक्रबार राति साढे ८ बजे तनहुँकै घुमाउनेबाट धरमपानी आउदै गरेको ग १ ज ६५५५ नम्बर जिप सडकबाट अन्दाजी एक सय मिटर तल खस्दा दुर्घटना भएको प्रहरीले जनाएको छ । दुर्घटनामा ८ जना घाइते भएका छन् ।

बन्दीपुर अस्पतालका अनुसार ज्यान गुमाउनेमा ९ महिने बालिका आरुबी थापा, २४ वर्षीय रोशन गुरुङ, ४२ वर्षीया सुशीलादेवी न्यौपाने, ५३ वर्षीय हरिबहादुर न्यौपाने, ७६ वर्षीया भीममाया गुरुङ र ४३ वर्षीय सुकबहादुर गुरुङ रहेका छन् । विममाया र सुकबहादुरको अस्पताल ल्याउदै गर्दा बाटोमा र अन्य चार जनाको घटनास्थलमै मृत्यु भएको जनाइएको छ ।

दुर्घटनाबाट घाइते भएका सबैको बन्दीपुर अस्पतालमा सामान्य उपचारपश्चात थप उपचारका लागि चितवन रिफर गरिएको प्रहरीले जनाएको छ । दुर्घटनामा परेको जिपका चालक सम्पर्कविहीन रहेको प्रहरीले जनाएको छ ।