कपिलवस्तु । बाँकेको नरेनापुरस्थित क्वारेन्टाइनमा रहेका एक युवाको कोरोना संक्रमणबाट मृत्यु भएको समाचारले चिन्ता बढाइरहेका बेला कपिलवस्तुको दुई वटा क्वारेन्टाइनबाट ४५ जना व्यक्ति फरार भएका छन् ।
कपिलवस्तुको यशोधरा गाउँपालिका– ८ का दुई छुट्टाछुट्टै क्वारेन्टाइनमा बसेका ४५ जना व्यक्ति भागेका हुन्।
उनीहरु शुक्रबार र शनिबार राति क्वारेन्टाइन छोडेर घर फर्किएका हुन् ।
शुक्रबार राति खोरियास्थित सरस्वती प्राविको क्वारेन्टाइनमा बसेका ३० जना र शनिबार राष्ट्रिय निमाबि सिंहखोरका१५ जनाले क्वारेन्टाइन छोडेको स्थानीय वडा अध्यक्ष सहाबुद्दिन मुसलमानले बताउनुभयो ।
भारत र अन्यत्रबाट आएका सबै जनालाई क्वारेन्टाइनमा नराखेको भन्दै उनीहरू भागेका हुन् ।
यशोधरा गाउँपालिकाकै १२ जनामा कोरोना संक्रमण पुष्टि भैसकेको छ ।
क्वारेन्टाइनमा बसेका व्यक्ति भागेपछि स्थानीयमा भने त्रास बढेको छ ।
अधिकांश क्वारेन्टाइन केन्द्रको सुरक्षा व्यवस्था कमजोर रहेको छ ।
प्रतिक्रिया