भक्तपुरकी कोरोना संक्रमित स्थानीय महिला जनप्रतिनिधि

काठमाडौं । कोरोना संक्रमणले पहिलो पटक स्थानीय जनप्रतिनिधिलाई पनि समातेको छ । स्वास्थ्य तथा जनसंख्या मन्त्रालयले शुक्रवार राति पुष्टि गरेका संक्रमितमध्येका एकजना भक्तपुर नगरपालिका–९ की महिला जनप्रतिनिधि भएको खुलेको हो ।

४२ वर्षीया ती महिला जनप्रतिनिधि राहत वितरणलगायतका काममा सक्रिय थिइन् । सोही क्रममै क्रममै कोरोना संक्रमण भएको हुन सक्ने अनुमान गरिएको छ ।

उनको सम्पर्कमा आएकाहरुको खोजी गर्न शनिबार बिहानबाट कन्ट्याक्ट ट्रेसिङ सुरु गरी पीसीआर परीक्षण हुने भक्तपुरका प्रमुख जिल्ला अधिकारी हुमकला पाण्डेले बतानुभयो ।

मुटुको बिरामी ती महिलाको ओपन हार्ट सर्जरी गरिएको थियो । घरमा श्रीमान र छोराछोरी छन् ।

अहिले उनलाई पाटन अस्पतालको आइसोलेसनमा राखिएको छ । सुरुमा घरमै बस्छु भनेकी उनलाई अस्पतालमा नै बढी सुविधा हुने भन्दै लगिएको थियो ।