बिबिसी । चीनको वुहानबाट सुरु भएको कोरोना भाइरस (कोभिड–१९)को त्रास अहिले विश्वभर छाइरहेको छ ।
चीनमा यसको रोकथाम र नियन्त्रणका लागि भएका प्रयासहरु केही सार्थक देखिए पनि अन्य देशहरुमा भने यसले थप समस्या निम्त्याउँदै गएको छ ।
यसैबीच इरानका स्वास्थ्य उपमन्त्रीलाई पनि कोरोना भाइरसको संक्रमण भेटिएको छ । कोरोना भाइरसको संक्रमणका कारण इरानमा हालसम्म १५ जनाको मृत्यु भइसकेको आधिकारिक तथ्यांक छ ।
यद्यपी मृतकको सङ्ख्या त्यसभन्दा बढी हुनसक्ने बताइएको बेला स्वास्थ्य उपमन्त्रीमाथि नै कोरोनाको संक्रमण देखिएको बिबिसीले जनाएको छ ।
सम्भावित कोरोना भाइरस महामारीसँग जुझ्नका लागि विश्वव्यापी रूपमा थप तयारी गरिनुपर्ने विश्व स्वास्थ्य सङ्गठनले जनाएका बेला विभिन्न देशहरूमा थप सङ्क्रमितहरू फेला पर्ने क्रम जारी छ ।
चीनपछि इटली, दक्षिण कोरिया र इरान नयाँ कोरोनाभाइरससँग जुधिरहेका छन् भने स्पेनमा एउटा होटलमा सयौँ मानिसहरूलाई कोठाभित्रै बस्न निर्देशन दिइएको छ ।
सोमवार मात्रै इराक, अफगानिस्तान, कुवेत, ओमान र बाहरेनमा कोरोनाभाइरसको पहिलो सङ्क्रमण फेला परेको बताइएको थियो ।
ती सबै देशमा सङ्क्रमण भएका पाइएकाहरू इरानबाट आएको बताइएको छ ।
प्रतिक्रिया