काठमाडौ । प्रतिनिधिसभाको बैठकमा नेपाली भूमिमा रहेका भारतीय सुरक्षाकर्मी हटाउन संकल्प प्रस्ताव पेश हुने भएको छ । आज (शुक्रबार) ११ वजे बस्ने बैठकको सम्भावित कार्यसूचीमा नेपाल कम्युनिस्ट पार्टी (नेकपा) का सांसद खगराज अधिकारीले पेश गर्नुहुने भएको छ ।
सम्भावित कार्यसूचीमा भनिएको छ, ‘भारत सरकारले नेपालको दार्चुला जिल्लाको कटियाङदी र लिम्पियाधुरा क्षेत्र समावेश गरी भारतको नक्सा प्रकाशित गरिसकेपछि सर्वदलीय बैठकबाट नेपालको भूभाग कसैबाट कुनै प्रकारले हडप्ने काम नहोस् भन्ने अडान कायम गरी नेपाल सरकारलाई निर्देशन गरेकोले कुटनीतिक र अन्य पहलकदमी गरी नेपालको भुभाग कायम गर्न र कालापानी क्षेत्रमा रहेका विदेशी सेना हटाउन आवश्यक छ ।
उक्त प्रस्तावमा नेकपाकी सांसद रामकुमारी झांक्रीले समर्थन गर्नुहुने छ । यस्तै बैठकमा कांग्रेस सांसद गगन थापाले कोरोना संक्रमणको जोखिमबारे जरुरी सार्वजनिक महत्वको प्रस्ताव पेश गर्ने सम्भावित कार्यसूची रहेको संसद सचिवालयले जानकारी दिइएको छ । यसैगरी व्यवस्थापन कार्य तर्फ विभिन्न विधेयकहरु प्रस्तुत हुने कार्यसूची रहेको जानकारी दिइएको छ ।
प्रतिक्रिया