बुटवल । रक्त क्यान्सरबाट पीडित नवलपरासी (नवलपुर) का एक बालकलाई डाक्टर तथा प्राध्यापकहरुले उपचारमा सहयोग पुगोस भनेर रुपन्देहीको देवदहमा आर्थिक सहयोग गरेका छन् ।
रक्त क्यान्सरबाट पीडित बनेका पुर्वी नवलपरासी (नवलपुर) अरुणखोलाका तीन वर्षीय बालक सोहील थापालाई देवदह मेडिकल कलेजका डाक्टर तथा प्राध्यापकहरुले आर्थिक सहयोग गरेका हुन् । कलेजको वेसिक साईन्स डिपाटमेन्टतर्फ अध्यापनरत प्राध्यापक डाक्टरहरुको टोलीले सोहीलकी हजुरआमा कमला थापालाई नगद २० हजार रुपैया सहयोग गरेका हुन् । डाक्टर शान्ता शर्माको नेतृत्वको डाक्टर/प्राध्यापकहरुको टोलीले ब्यक्तिगत रुपमा संकलन गरेको २० हजार रुपैया बालककी हजुर आमा कमलालाई हस्तान्तरण गरेका थिए ।
आर्थिक सहयोग जुटाउन सक्रिय हुनु भएकी डाक्टर शान्ता शर्माको नेतृत्वमा संकलन भएको रकम हस्तान्तरण कार्यक्रममा प्राध्यापक/डाक्टर पिसी महाजन, प्राध्यापक/डाक्टर बसिष्ट रिजाल लगायतले सानो रकम भएपनि उपचारमा सघाउ पुगोस भनेर पीडितको परिवारलाई सहयोग गरिएको बताउनुभयो । सहयोग रकम लिदै बालककी हजुरआमा कमलाले आर्थिक अवस्था कमजोर भएका कारण नातीको उपचारमा समस्या परेको गुनासो गर्दै विभिन्न क्षेत्रका सहयोगी मनहरुले गरेको सहयोगले उपचारमा सहयोग पुगेको बताउनुभयो ।
सोहीलको विगत एक महिनादेखि काठमाण्डौको कान्ति बाल अस्पतालमा उपचार चलि रहेको छ । रक्त क्यान्सरको समस्यासँग झेल्दै आएका बालकको अझै एक वर्ष विभिन्न चरणको उपचार कान्तिमै जारी रहने डाक्टर शर्माले जानकारी दिनुभयो ।
यसअघि पनि बालकको उपचारका लागि देवदहमै लायन्स क्लव अफ बुटवल मणि उजेशले २० हजार रुपैया आर्थिक सहयोग गरेको थियो ।
प्रतिक्रिया