काठमाडौ । सत्तारुढ नेकपाले बुधबार सचिवालय बैठक बोलाएको छ । प्रधानमन्त्री एवं नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच मंगलबार भएको भेटवार्तापछि बुधबार सचिवालय बैठक बोलाइएको हो ।
बुधबार अपराह्न ४ बजेका लागि बैठक बोलाएको बालुवाटार स्रोतले जनाएको छ । त्रिवि शिक्षण अस्पतालमा मिर्गौला प्रत्यारोपणपछि ओली बालुवाटारमै आराम गरिरहनुभएको छ । फागुन १९ मा अस्पताल भर्ना हुनभएका प्रधानमन्त्रीको २१ गते बुधबार मिर्गौला प्रत्यारोपण गरिएको थियो। ओली फागुन ३० मा अस्पतालबाट डिस्चार्ज हुनुभएको थियो ।
उहाँ डिस्चार्ज भएको भोलिपल्ट अध्यक्ष प्रचण्ड स्वास्थ्य अवस्था बुझ्न बालुवाटार पुग्नु भएको थियो । त्यसैदिन नेकपा वरिष्ठ नेता माधवकुमार नेपाल, प्रवक्ता नारायणकाजी श्रेष्ठ, महासचिव विष्णु पौडेल लगायतले पनि प्रधानमन्त्री ओलीलाई भेटेका थिए ।
भोली बुधबार बस्ने सचिवालय बैठकमा पार्टी एकताका बाँकी काम, एमसीसी कार्यदलको प्रतिवेदन र राष्ट्रिय सभामा उपाध्यक्ष गौतमलाई पठाउने निर्णयबारे छलफल हुन सक्ने सचिवालयका एक नेताले बताए । यसर्थ भोलिको सचिवालय बैठकलाई चासोका साथ हेरिएको छ ।
प्रतिक्रिया