एजेन्सी । कोरोना भाइरसको उद्गमस्थल मानिएको चीनले उक्त भाइरसविरुद्धको भ्याक्सिन परीक्षण सुरु गरेको छ । विश्वभर महामारी फैलाएको कोरोनाविरुद्ध चीनले भ्याक्सिन तयार गरि क्लिनिकल परीक्षण सुरु गरेको हो ।
यसअघि अमेरिकाले पनि भ्याक्सिन तयार भएको र परीक्षण पनि सुरु भएको जनाएको थियो । अमेरिकाले परीक्षण सुरु भएको बताएको १९ घण्टापछि चीनले पनि भ्याक्सिनको क्लिनिकल परीक्षण सुरु गरेको हो । विश्वका दुई ठूला अर्थतन्त्र अमेरिका र चीनबीचको प्रतिस्पर्धाका कारण विश्व बजारमा कोरोनाविरुद्धको भ्याक्सिन छिट्टै उपलब्ध हुने आशा गरिएको छ ।
तर चीनले भने भ्याक्सिनको परीक्षण सकेर ठूलोमात्रामा बजारमा पठाउन अझै १२ देखि १८ महिना लाग्नसक्ने बताएको छ । चिनियाँ जनमूक्ति सेनामा मेजर जनरल चेन वेइ र उनको टिमले कोरोनाविरुद्धको भ्याक्सिन पत्ता लगाएको हो । कोरोनाको सुरुवात भएको वुहानमा पुगेर मेजर वेइको टिमले इबोला भ्याक्सिन बनाएको अनुभव र स्थानिय कम्पनीसँगको सहकार्यमा कोरोना भ्याक्सिनमाथी फार्मेसी तथा औषधि विज्ञानमा आधारित भएर अनुसन्धान गरेको छ ।
उत्पादन प्रक्रिया र गुणस्तर नियन्त्रण समिक्षाको आधारमा उनिहरुले भ्याक्सिनको डिजाइन, संरचना र उत्पादनलाई निकै छिटो सकाएका सिसिटिभीले उल्लेख गरेको छ । त्यसलगत्तै वेइको टिमले उत्पादन गरेको भ्याक्सिनको क्लिनिकल समिक्षा दर्ता पारित भएसँगै क्लिनिकल परीक्षणको अनुमती पाएको थियो ।
वेइको टिमले कोरोनाविरुद्धको भ्याक्सिनलाई सुरक्षित, गुणस्तरीय, उपयोगी र ठूलोमात्रामा उत्पादनका लागि आन्तरिक नीतिनियम र अन्तर्राष्ट्रिय मापदण्ड अनुरुप भएको पनि दावी गरेको छ । कोरोना संक्रमण सुरु भएसँगै विश्वका दर्जन देश भ्याक्सिन पत्ता लगाउने दौडमा निस्किएका थिए । तर चीन र अमेरिकाले भने सफलता पाएका छन् ।
प्रतिक्रिया