काठमाडौ । कोरोना संकटका कारण नेपाली अर्थतन्त्रमा गम्भीर संकट पर्ने देखिएको छ । विश्व बैंकले आज एक प्रक्षेपण गर्दै कोरोना भाइरसका कारण नेपालको अर्थतन्त्रले गम्भीर संकटको सामना गर्नुपर्ने आंकलन गरेको हो ।
विश्व बैंकले आर्थिक वृद्धिदरमा पनि उच्च गिरावट आउने निस्कर्ष निकालेको छ । दक्षिण एसियाली देशहरुको आर्थिक अवस्थाबारे रिर्पोट सार्वजनिक गर्दै विश्व बैंकले अर्थतन्त्रमा पर्ने संकटको असर न्यूनिकरण गर्न विशेष ध्यान दिनुपर्ने जनाएको छ ।
सन् २०२० मा परेको असर न्यूनीकरणमा बढी ध्यान दिनुपर्दा त्यसपछिका लगातार दुई आर्थिक वर्षको आर्थिक वृद्धि दरमा समेत असर पुग्ने आंकलन विश्व बैंकको रहेको छ । नेपालको अहिलेको आर्थिक वृद्धिदर ७ प्रतिशतको हाराहारीमा रहेको छ ।
एसियाली विकास बैंकले नेपालको आर्थिक वृद्धिदर ४.३ देखि ५.३ प्रतिशतको बीचमा रहने प्रक्षेपण गरेको थियो । विश्व बैंकले भारत, पाकिस्तान, बंगलादेश, भुटान, श्रीलंका मालदिभ्स, अफगानिस्तानको आर्थिक वृद्धदर समेत घट्ने प्रक्षेपण गरेको छ ।
श्रीलंका, मालदिभ्स, पाकिस्तान र अफगानिस्तानको आर्थिक वृद्धिदर ऋणात्मक हुने बैंकले अनुमान बैंकको छ । पर्यटनमा आधारित दक्षिण एशियाली मुलुकहरुको अर्थतन्त्र सबैभन्दा बढी धरासायी हुने बंैकले प्रक्षेपण गरेको छ ।
नेपाल लगायतका दक्षिण एशियाली देशहरुमा रेमिटयान्समा उल्लेख्य कमी आउंदा आर्थिक वृद्धिलाई प्रभावित पार्ने देखिन्छ । पर्यटन, व्यापार र औद्योगिक उत्पादन एवं त्यसको खपतमा कमीले आर्थिक वृद्धिदरलाई प्रभावित बनाउनेछ ।
पर्यटन, खुद्रा व्यापार र अनौपचारिक क्षेत्रमा काम गर्ने मानिसहरु कोभिडले बढी प्रभावित हुने छन् भने सामाजिक असमानताका कारण धनी र गरिब बीचको खाडल अझ बढी देखिने बैंकले उल्लेख गरेको छ ।
अर्थतन्त्रमा परेको प्रभाव नियन्त्रणका लागि सरकारहरुले उचित नीति ल्याउनुपर्ने सुझाव पनि विश्व बैंकले दिएको छ ।
प्रतिक्रिया